Eskola jangeletako aldaketa kritikatu dute sindikatuek

Eusko Jaurlaritzak ez du eragileekin adostu eskola jangeletako aldaketa, Gure platera, gure aukera plataformaren arabera. Irailetik aurrera, zerbitzua zuzenean kudeatzeko aukera emango diete guraso elkarteei, baina taldeak ez du uste hori bat datorrenik euren eskariekin: elikadura burujabetza, jangela hezitzaileak, eta eskola komunitatearen eta administrazioen kudeaketa partekatua.

ELAk, berriz, «gardentasunik eza» egotzi dio gobernuari, eta «ardura publikoak alboratzea», proposamena «enpleguarekiko eta lan baldintzekiko mespretxuz» egina delakoan. UGTk eta LABek ere adierazi dute 600 enplegu arriskuan jarri dituela.

EH Bilduk ere kritikatu du eredu berria: jangelak ikastetxeek kudeatu beharko lituzketela esan du. «Guraso elkarteak boluntarioek osatzen dituzte; ez dute gaitasunik jangelak kudeatzeko, eta Jaurlaritzak badaki».