Indarkeria Matxistaren Aurkako Eguna

Aurten «parte hartze handia» izan du Beldur Barik-ek

12 eta 16 urte bitarteko gazteek berrehun lanetik gora aurkeztu dituzte. Sari banaketa 'streaming' bidez ikusteko aukera egongo da.

Beldur Barik programaren aurtengo edizioaren aurkezpena, atzo. EMAKUNDE.
jone arruabarrena
2020ko azaroaren 19a
00:00
Entzun
Beldur Barik programa gazteen artean «erreferente sendoa» dela berretsi du Emakundek. Izan ere, berrehun lan baino gehiago aurkeztu dituzte 12 eta 16 urte bitarteko ikasleek, eta, ezohiko baldintzak kontuan hartuta, «parte hartze handia» izan dela adierazi zuen atzo Izaskun Landaida Emakundeko zuzendariak. Sari banaketa Donostian izango da, azaroaren 20an. Streaming bidez soilik ikusi ahal izango da.

Askotariko gaiak jorratu dituzte lehiaketara aurkeztutako piezetan: nesken ahalduntzea, generoak markatutako rolak eta estereotipoak, bortxaren aurkako erantzun kolektiboa... «Antzeman daiteke gazteriak gero eta argiago identifikatzen dituela indarkeria sexista sortzen duten desberdintasun faktoreak». Landaidak erantsi du horrelako proiektuen bidez neskengan «ahalduntzea» sustatzen dela, baita «indarkeria egoerei erantzuteko gaitasuna» ere; mutilen artean, berriz, hausnarketa prozesuak bultzatzen dituzte.

Kanpaina ugari martxan

Diputazioak ere ari dira azaroaren 25arekin lotutako kanpainak aurkezten. Bizkaiko Foru Aldundiak indarkeriaren ikusgaitasunean jarri du arreta; Ez ikusi ez dagoenik. Indarkeria matxista da lelopean, bortizkeria ez justifikatzera deitu dute. Gipuzkoako Aldundiak, berriz, eguneroko eraso normalizatuen gaineko kontzientzia hartzea jarri du helburu, Indarkeria matxistaren aurrean, ez zaitez ikusle huts bat izan lelodun kanpainaren bidez.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.