Albistea entzun

ATZEKOZ AURRERA. Nazanin Zafarnia. Ingeniaria eta Itziar Ituñoren zalea

«Euskaraz gero eta gehiago saiatzen naiz»

Itziar Ituñoren zalea da Zafarnia, eta horrek euskara bere kabuz ikastera eraman du, Teheranen. Aktorearen zaleen kontu bat kudeatzen du Instagramen. «Lagun zoragarriak egin ditut horri esker».
NAZANIN ZAFARNIA Tamaina handiagoan ikusi

Urtzi Urkizu -

2022ko urtarrilak 28

Ehungintzako ingeniaria da Nazanin Zafarnia (Teheran, 1993). Nanoteknologian master bat egin zuen, eta, gaur egun, ehun fabrika batean ari da lanean, ur zikinetatik substantzia toxikoak kentzeko proiektu batean. Aurreko asteburuan, Mantangorri-n Ituñori egindako elkarrizketa ingelesera itzuli eta Instagramen zabaldu zuen. Euskaraz erantzun die galderei.

Loreak filmean deskubritu zenuen Itziar Ituño. Baina orduan ez zenekien euskaraz, ezta?

Loreak filmean ikusi nuen Ituño lehen aldiz, bai. Pelikula Oscar sarietarako hautagai izateko bidean zegoen, eta hainbat jaialditan ematen ari ziren. Orduan ez nuen euskal aktorerik ezagutzen, eta ez nekien ezer Euskal Herriari buruz.

Ituñoren zerk liluratu zintuen gehien?

Zintzoki, hasieran itxurak, batez ere begiek. Baina haren jarduteko gaitasunak ere piztu zuen nire arreta. Ituñoren beste lanak ikusten hasi nintzen, nahiz eta ez nuen hizkuntza ulertzen: emozioak primeran eta zuzen transmititzen zituela sentitu nuen. Denborarekin, haren gizarte jardueraz eta pentsamoldeaz jabetu nintzen. Zenbat saiatu den dagoen tokira iristeko. Hark dio bizitzan arriskatu eta gauza berriak onartu behar ditugula, eta askotan ahalegindu behar dela arrakasta izateko. Horrek guztiak gero eta gehiago liluratzen ninduen. Bera bezalako pertsonak oso inspiratzaileak izan daitezke.

Aktorearen zein film eta telesail ikusi zenituen gero?

El final de la noche filma ikusi nuen. Horren ostean, Goenkale ikusten hasi nintzen. Gero, La casa de papel telesailari ekin nion. Haren lan guztiak ikusiak ditut. Goenkale osorik bukatu nuen: Nekane Beitia pertsonaia eta haren bidaia asko maite ditut.

Nolakoa izan da euskara ikasteko prozesua?

Oso zaila. Batez ere, zuk zeuk bakarrik ikasi nahi duzunean. Itziar Ituño ulertzeko beharra sentitu nuen, eta, beraz, haren lanak eta elkarrizketak ikusten hasi nintzen. Goenkale-rekin, koaderno bat hartu eta ulertzen ez nituen hitz guztiak idazten nituen; gero, esanahia bilatzen aritzen nintzen. Internet bidezko ikastaro bat egin nuen, baina oso denbora laburrekoa, eta presioa eragin zidan. Ondotik, euskarazko lanak ikustea eta euskal musika entzutea izan da egin dudana. Oraindik ez naiz horren ona, baina gero eta gehiago saiatzen naiz euskaraz.

Zer da euskararen inguruan arretarik handiena piztu dizuna?

Euskal Herriaren sustraiak oso aberatsak dira, nire herriarenak bezalakoak. Nire herriak kondaira asko ditu, oso liburu zaharrak eta poeta handiak. Euskara oraindik erabiltzen diren antzinako hizkuntza bakanetako bat da. Herrialde bateko hizkuntza ofizialtzat aitortu diren antzinako azken hizkuntzetako bat ere bada. Hori guztia nahikoa izan zen nire arreta pizteko. Tradizio ederrak ditu euskal kulturak.

Itziar Ituñoren zaleen sare sozialetako kontuak sortu eta kudeatzea nola izan da?

Zoramena da. Pandemiako konfinamenduaren hasieran, dena benetan nahastuta zegoenean, zaleen kontu bat irekitzea erabaki nuen. Hasieran, ondo pasatzeko zen, Itziarren fenomenoaren bitartez jende gehiago ezagutzeko. Kontua arrakastatsua izan zen. Orain, lagun on asko ditut horren aitzakian. Gainera, Itziar zenbat eta gehiago ezagutu, orduan eta ezinezkoagoa da harengandik alde egitea. Ez naiz damutzen horri ekin izanaz.

Nolako harremana duzu Ituñoren beste zale batzuekin?

Lagun zoragarriak egin ditut: taldetxo bat dugu Mazedonia eta Armeniako bi neskekin. Belgikako eta Frantziako beste bi lagun min ere baditut. Beste neska bat aurkitu nuen nire herrialdekoa, Irangoa.

Netflixek Intimidad telesaila estreinatuko du, eta Paul Urkijok, Irati filma. Ituño bietan ageri da...

Netflix debekatuta dago Iranen, baina jada aurkitu dut Intimidad ikusteko modua. Eta ez ahaztu Ituño izango dela Black Is Beltza 2 filmeko ahotsetako bat.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©RAUL BOGAJO / FOKU

«Ingurukoei maite ditudala esateko modua da poesia»

Unai Etxenausia

Zorione Erezuma olerkigileari barren-barrenetik ateratzen zaio poesia idaztea. Bere olerki ikuskizunak «meditazio bidaia mistiko» moduan definitzen ditu.
Haurrak eta Hazi eta Ikasiko boluntarioa eskolako lanak egiten, Morlanseko lokalean. ©GORKA RUBIO / FOKU

Irakasle, konplize eta bidelagun

Jakes Goikoetxea

Donostiako Hazi eta Ikasi elkarteak eskolako lanak egiten eta ikasten laguntzen die zailtasunak dituzten familietako haurrei. Haurren itxaron zerrenda luzea dute, baina boluntarioak falta dituzte, boluntario euskaldunak.

Iñaki Zarraoa, Alberto Surio, Josu Ortuondo, Maite Iturbe, Jose Maria Gorordo eta Andoni Ortuzar EITBko zuzendari nagusi ohiak eta Andoni Aldekoa gaur egungo zuzendari nagusia, atzo, Bilbon. ©MARISOL RAMIREZ / FOKU

Aldekoak esan du EITBk datozen aldaketei aurre egin behar diela

Urtzi Urkizu

EITBren 40. urteurreneko ekitaldia egin dute, Bilbon. Politika, kultura, gizartea eta ekonomia arloetako 300 gonbidatu inguru bertaratu dira

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Urtzi Urkizu

Informazio osagarria

Iruzkinak kargatzen...