Albistea entzun

Eusko Jaurlaritzak ukatu egin du hezkuntza akordioa hautsi izana

EH Bilduk eta EP-IUk salatu egin dute PP+C's-ri 2 urtekoen gelak ituntzeko eskaintza egin izana. EH Bilduk eskatu du urgentziaz bil dadila akordioaren jarraipen batzordea
Jokin Bildarratz Hezkuntza sailburua, Eusko Legebiltzarrean, artxiboko irudi batean.
Jokin Bildarratz Hezkuntza sailburua, Eusko Legebiltzarrean, artxiboko irudi batean. RAUL BOGAJO / FOKU Tamaina handiagoan ikusi

Irati Urdalleta Lete -

2022ko azaroak 18

Eusko Legebiltzarreko lau alderdi nagusiek sinatutako hezkuntza akordioaren inguruan hautsak harrotu dira berriro ere. Herenegun publiko egin zuten Eusko Jaurlaritzako Ekonomia eta Ogasun Sailak aurrekontuen negoziazioetan PP+C's-ri eskaini diola itunpeko ikastetxeetan 2 urteko haurren gelak ere ituntzea —ekaineko agindu batean jasota dago— eta Haurreskolak partzuergoa doako izatea —hori ere jakinekoa zen. Lehen neurriaren inguruan ezinegonez mintzatu dira itunaren sinatzaileetako bi, EH Bildu eta Elkarrekin Podemos-IU. Gogor hitz egin du EP-IUren bozeramaile Miren Gorrotxategik Eusko Legebiltzarrean, eta Eusko Jaurlaritzari hezkuntza ituna haustea leporatu dio: «Gobernuak ekintza honekin ituna apurtu du». Jokin Bildarratz Hezkuntza sailburuak, ordea, ukatu egin du halakorik gertatu denik. EH Bildu ere kritiko agertu da, Ikoitz Arrese legebiltzarkidearen ahotik.

EP-IU izan da desadostasuna erakusten lehenengoa. Gorrotxategiren esanetan, itunpeko ikastetxeen eremua zabaldu egingo da gela horiek itunduta: «Areagotu egiten du pribatuaren indarra; ez publikoarena».

Alabaina, itunean jarraitzen dutela zehaztu du: «Ez gaude akordiotik kanpo. Eusko Jaurlaritzaren ekintzen zain geratzen gara». Dena den, zalantzan jarri du Hezkuntza Legeari babesa ematea bera ere; esan dutenez, ez baitaude prest 2 urtekoen gelak ituntzea jasotzen duen legea onartzeko. Gainera, «desleialtasuna» ikusi dute, eta «onartezina» begitantzen zaie eskaintza «akordioaren antipodetan» dagoen talde bati egin izana.

EH Bildu ere ez dago konforme. Arreseren irudiko, «ulergaitza» da Jaurlaritzak PP+C's-ri egitea eskaintza, eta atzean «intentzio politikoak» egon daitezkeela iradoki du: «Eskaintza horrek mesfidantza eragin digu, ulergaitza delako; ez dugu ulertzen zertara datorren hezkuntza akordioa sinatu ez duen alderdi bati horrelako eskaintza bat egitea, ez dugu ulertzen zein den eskaintza horren intentzio politikoa, Jaurlaritzak bidali nahi duen mezua». EH Bilduri eskaintza horrek «deskonfiantzak» eragiten dizkiola erantsi du. Gainera, gogorarazi du neurria ez dagoela akordioan jasota, agindu batean baizik.

Gauzak horrela, irizten dio egoera «oso nahasia» dela eta «gauzak ez doazela ondo»: «Akordioaren garapenean tirabira batzuk izan ditugu, eta atzokoak [herenegungoak] ez du batere laguntzen; egoera zaildu egiten du, mesfidantza sortzen duelako». Hori ikusita, eskatu du urgentziaz bil dadila itunaren jarraipen batzordea datorren astean; Bildarratz prest agertu da.

Neurri zehatz batez harago, Hezkuntza Legearen aurreproiektua ere baloratu du Arresek. Ez ditu «asebetetzen»: «Oraindik ere falta dira hezkuntza akordioan nuklearrak ziren hainbat kontu; adibidez, Euskal Hezkuntza Zerbitzua definitzea».

Oposizioaren kritikei erantzun die Bildarratzek, eta bestelako bertsioa eman du. Haren hitzetan, «goitik behera» errespetatzen dute ituna: «Berresten dut konpromiso argia dugula hezkuntza akordioarekin. Ez da akordiorik hautsi, eta ez da egon leialtasun faltarik».

Areago: neurriak akordioarekin bat egiten duela iruditzen zaio. Izan ere, uste du balekoa izango dela segregazioari ikasleak eskolara sartzen diren unetik aurre egiteko, «hezkuntza orekatua» eta doakoa izatea baitu xede. Dena den, onartu du ez dakiela zein den Ekonomia eta Ogasun Sailak PP+C's-ri eskaintza hori egin izanaren arrazoia, Hezkuntza Sailak jada aintzat hartuta zeukan neurria delako.

Ez da lehenengoa

Oraingoa ez da akordioari buruzko lehen tirabira. Maiatzean eta ekainean ere eztabaida egon zen, unibertsitate kanpoko ikastetxeen sarea antolatzeko eta planifikatzeko dekretuaren zirriborro bat publiko egin zenean —besteak beste, planteatzen zuen itunpekoetan ratioak jaistea eta ikasle zaurgarriak modu orekatuan banatzea—. Gorrotxategik esan zuen testuak ez zuela errespetatzen akordioaren «letra eta izpiritua». Halere, akordioaren jarraipen batzordean itunaren gaineko konpromisoa berretsi zuten lau alderdiek.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Pertsona batzuk, maskara jantzita, autobusean ©Juan Carlos Ruiz/ Foku

Hego Euskal Herriko garraio publikoan otsailaren 8an kendu ahalko da maskara

Berria

Espainiako Osasun ministroak esan du datu epidemiologikoak «oso egonkorrak» direlako hartu dela erabakia. Osasun zentroetan eta farmazietan derrigorrezkoa izango da aurrerantzean ere.

Dozenaka pertsona bildu dira protestara. ©MONIKA DEL VALLE/FOKU

«Pobreen aurkako gerra» salatu dute, hildako etxegabea oroitzean

Maite Asensio Lozano

Etxebizitza eskubidea bermatzeko exijitu dute Eskubide Sozialen Kartak eta AZETtaldeak

LAB sindikatua elkarretaratzea antolatu du gaur Iruñean, osasun publikoa babesteko asmoz ©LAB sindikatua

LAB sindikatuak medikuen esklusibotasuna ezabatzeko erabakia kritikatu du

Itsaso Jauregi

Sindikatuak esklusibotasuna kentzearen ondorioz osasungintza publikoari kalte egingo diola adierazi du Iruñeko elkarretaratzean

Etxegabe bat, Bilbon, kalean lotan. ©LUIS TEJIDO / EFE

Hotzaren zauriak espaloian

Edurne Begiristain - Ion Orzaiz Xabier Martin - Garazi Aduriz

Bilbon etxegabe bat hil izanak jopuntuan jarri ditu kalean bizi direnentzako baliabideak eta politika publikoak. «Premiazko neurriak» ezarri dituzte hiriburuetan, hotz boladari aurre egiteko

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.