Albistea entzun

Espejo guardia zibila mailaz igo izana salatu dute EAJ, EH Bildu eta EP-IUk

Espainiako Gobernuak biktimak «umiliatu» dituela adierazi dute agiri instituzional batean. PSEk «errespetua» agertu dio Zabalzaren sendiari
Iñigo Iturrate (EAJ), Julen Arzuaga (EH Bildu) eta Gustavo Angulo (EP-IU), atzo, adierazpena aurkezten.
Iñigo Iturrate (EAJ), Julen Arzuaga (EH Bildu) eta Gustavo Angulo (EP-IU), atzo, adierazpena aurkezten. BERRIA Tamaina handiagoan ikusi

Edurne Begiristain -

2023ko apirilak 5 - Gasteiz

Espainiako Gobernuak Mikel Zabalzaren kasuarekin lotura izan zuen Arturo Espejo Valero guardia zibila mailaz igo izana gogor kritikatu dute EAJk, EH Bilduk eta Elkarrekin Podemos-IUk, adierazpen instituzional batean. Hiru taldeek agiri bat hitzartu dute Eusko Legebiltzarrean, eta Iñigo Iturratek (EAJ), Julen Arzuagak (EH Bildu) eta Gustavo Angulok (Elkarrekin Podemos-IU) agerraldi bateratua egin dute horren berri emateko.

EAJ, EH Bildu eta EP-IU oso kritiko agertu dira Espainiako Gobernuaren erabakiarekin. Hiru taldeek sinatutako agirian, gogoratu dute gehiengoa dutela Eusko Legebiltzarrean, eta ez dutela begi onez ikusten Madrilen erabakia, Espejo Mikel Zabalzaren kasuarekin lotuta egon zelako.

Zabalzaren desagerpenarekin eta torturekin nahastuta egon zen Arturo Espejo guardia zibila, 1985. urtean. Espainiako Gobernuko Defentsa eta Barne ministerioek, baina, mailaz igotzea erabaki zuten joan den urtean: Guardia Zibilaren teniente jeneral eta Guardia Zibileko Sostengu Agintaritzako buru izendatu zuten. Mailaz igotzeko erabakia iaz hartu bazuten ere, duela gutxi jakin da berria.

Espainiako Gobernuaren erabakia gogor gaitzetsi dute EAJk, EH Bilduk eta EP-IUk testuan, eta gogoratu dute Eusko Jaurlaritzak biktima gisa aitortua duela Mikel Zabalza, Intxaurrondoko Guardia Zibilaren kuartelean atxilotuta zegoela sufritutako torturengatik. Adierazpenean diote Espainiako Estatuaren indarkeria pairatu duten biktimei erreparazioa emateko 12/2016 legearen arabera aitortu zuela Jaurlaritzak biktima gisa, eta horrek auzitan jartzen duela Espainiako Gobernuak bere garaian Zabalza kasuari buruz emandako bertsioaren «sinesgarritasuna».

Era berean, salatu dute Espejo guardia zibila mailaz igotzeko erabakia ez dela kasu bakarra: «Zoritxarrez, estatuko indarkeriaren egileei emandako maila igoeren, kondekorazioen eta sarien beste kasu bat da». Agiriaren sinatzaileen ustez, erabaki horrek biktimak «umiliatzen, iraintzen eta berriro biktimizatzen» ditu. Horrez gain, hiru alderdiek «babesa eta aitortza» adierazi diete estatuaren biktimei, eta erreparaziorako dituzten eskubideei «errespetua» agertu.

PSE-EEren oharra

EAJk, EH Bilduk eta Elkarrekin Podemos-IUk adierazpen instituzionala plazaratu eta gutxira, PSE-EEk ohar bat kaleratu du Mikel Zabalzaren sendiari «errespetua» eta «elkartasuna» agertzeko. Sozialistek konpromisoa azaldu dute «terrorismoaren eta biolentziaren» biktima ororen erreparazioarekin eta justiziarekin, «baita poliziaren gehiegikeria eta abusuen biktimekin ere».

Halaber, sozialistek gogora ekarri dute Eusko Jaurlaritzak «motibazio politikoko» biktimatzat aitortu duela Zabalza, baina sozialistek oraindik «osatu gabe» dituztela kasu hark irekitako «zauriak». Zabalzarena bezalako beste kasu batzuk argitzeko eskaerekin bat egin dute, era berean. Esan dute PSE-EEk «hamarkadak» daramatzala indarkeriaren biktima guztien alde lanean, eta beti egongo dela haien ondoan. Halere, argi utzi dute ez dutela biktimak parekatzeko asmorik, eta indarkeria mota guztiak arbuiatzen dituztela.

Asko balio du irakurri duzun albiste/artikulu honek. Talde baten lanaren emaitza da.

Albiste hau zuri helarazteko eta talde honek bere lana baldintza egokietan egin dezan, BERRIAk ezinbestekoa du zure sostengua.

Zure babes ekonomikoarekin, aldi hau kontatzeko funtzioa betetzen jarraitu nahi dugu: kazetaritza konprometitu, kalitatezko eta independentea egiten.

Albiste gehiago

EH Bilduko Ikoitz Arrese, artxioko irudi batean. ©Raul Bogajo / Foku

Hezkuntza Akordioarekin «leial» jokatuko duela iragarri du EH Bilduk

Gotzon Hermosilla

Gainerako alderdiei «zorroztasuna» eskatu die asteartean irekiko den eztabaida fasean «lege on bat» erdietsi ahal izateko

Nafarroako Unibersitate Ospitalea, artxiboko irudi batean. ©IÑIGO URIZ / FOKU

Kontuen Ganberak ebatzi duenez, «Osasunbidea ez da betetzen ari pazienteak artatzeko epeak»

Ion Orzaiz - Mikel Elkoroberezibar Beloki

Itxaron zerrendei buruzko txostena argitaratu du Nafarroako Kontuen Ganberak. Ondorioztatu du %29 handitu zirela 2018 eta 2022 bitartean.

Abuztuan izandako beroaldiaren irudi bat, Bilbon. ©JAVIER ZORRILLA / EFE

'El Niño', eta tenperaturak goia jo duen urtea

Iñaki Petxarroman

Munduko Meteorologia Erakundeak uztailean eman zuen hasitzat 'El Niño' fenomenoa. Jatorria Ozeano Barean du, baina eragin ohi duen tenperatura igoerak mundu osoa astindu du, inoizko udarik beroena izan baita. Alabaina, neguan izan ohi du indar handiena, eta uste dute 2024an nabarituko direla horren ondorioak.

 ©JAZKI FONTANEDA / FOKU

«Klima krisiari 'El Niño' gehituta, hurrengo urteak oso-oso beroak izango dira»

Nagore Arin - Iñaki Petxarroman

'El Niño' fenomenoak Euskal Herrian dituen ondorioak ikertu ditu, besteak beste, Tecnaliako ikertzaile eta Euskalmeteko meteorologoak.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...