Hamaika Gara-k ekitaldi politiko eta kultural bat egingo du, bihar

Erabakitzeko eskubidea legez jasotzearen eta erreferendum baten aldeko sinadurak biltzeari ekin dio berriro Hamaika Gara egitasmoak, eta, testuinguru horretan, ekitaldi kultural eta politiko bat antolatu du biharko. Altxa! izena jarri diote ekitaldiari, eta 18:00etan izango da, Durangoko Plateruenan (Bizkaia). COVID-19aren izurriaren eraginez, ordea, ezin izango da bertatik bertara ikusi; sarean egongo da ikusgai, Hamaikagara.eus webgunean eta herri ugaritan antolatu dituzten emanaldietan.

Antolatzaileen arabera, «nazioarteko erreferentziazko hainbat pertsonak eta hainbat kulturgilek» parte hartuko dute ekitaldian: Erika Olaizola, Iraia Elias eta Laura Penagos aktoreek, Amets Arzallus bertsolariak, eta Eñaut Elorrieta, Ruben Caballero eta Dupla taldeko musikariek.

Webgunerako sarbidea bihar eskuratu ahalko da, webgunean bertan, 3 euroan. 40 minutu inguruko ikuskizun batekin hasiko da saioa. Azken hamarkadetan zeharreko bidaia bat proposatuko du Gotzon Barandiaran gidoilariak, «euskaldunon erreferente kulturalak» ardatz hartuta: «Gure herria etengabe egon izan da mugimenduan; behin eta berriz asmatu eta berrasmatu dugu nola egin aurrera».

Amancay Gaztañaga zuzendariak azaldu duenez, transmititu nahi izan dute herri gisa «nondik gatozen, nora goazen, bide horretan zer ebaki behar izan dugun, eta nola eraiki genezakeen etorkizun berri bat atzean utzitakoa galdu gabe». Ikuskizunaren ostean, sustatzaileek hitzaldi politiko bateratu bat egingo dute.