UPNk garaipen mingotsa izan du, eta EH Bilduk jauzi handia eman du

UPNk irabazi ditu hauteskundeak, baina PSNk izkin egin dio eskuineko alderdiak kanpainanegin dion presioari. Aldaketa handirik ezean,eskuineko alderdiak zail izango du Javier Esparza presidente egitea. Alderantziz, eserlekuetan mugimenduak egon badira ere, PSNk gobernua osatzeko aukera izango luke, Geroa Bairen eta Zurekin Nafarroaren sostenguarekin. Maria Txibite lehendakarigaiak formula politiko hori errepikatzeko asmoa adierazi zuen atzo bertan, argi eta garbi. Hala, berriro ere EH Bildu erabakigarria izango da. Legealdian, oposiziotik jokatu duen rolari etekina atera dio koalizio abertzaleak eta jauzi handia eman du, beste bi parlamentari gehiago erdietsita.

Duela lau urteko hauteskundeekin alderatuta, abstentzioak 4,5 puntu egin du gora. Herritarren %67,8k eman zuten botoa.

Nahiz eta berriro ere bozak irabazi, garaipen gazi-gozoa izan da Javier Esparzaren alderdiarentzat. 1991tik beti irabazi ditu hauteskundeak, baina ordutik legealdiz legealdi 17 eta 23 parlamentari artean mugitu da UPN, salbuespen batekin: 2015ean hamabost jarleku erdietsi zituen; orain lortu duen kopuru bera, hortaz. Navarra Sumak duela lau urte 20 parlamentari lortu zituen, eta ondorioz emaitza horretatik urrun geratu da. UPNk ez dio eskuinaren hausturari etekinik atera. «Eta hala eta guztiz ere, lehen indarra izan gara», nabarmendu zuen Esparzak amaieran. «Inork ezin dezake esan gau ona dela, EH Bildu hainbeste igo bada».

UPNren estrategiak porrot egin du hein handi batean, eskuineko beste alderdien botoak bereganatu eta batez ere PSNrekin haserre egon zitezkeen boto-emaileak erakarri nahi baitzituen. Haatik, PSNk eutsi egin dio. Duela lau urte bezala, 11 parlamentari izango ditu alderdi sozialistak. Bere lehen hitzetan, Maria Txibitek UPNri gogorarazi zion ez dela boto ihesik egon, eta nabarmendu zuen PSNk posizioa «sendotu» duela. Geroa Bairen zein Zurekin Nafarroaren botoak gehituta, eskuinak baino jarleku gehiago izango dituzte legebiltzarrean, eta horregatik PSNren lehendakarigaiak argi adierazi zuen aurreko legealdiko formula errepikatu nahi duela. Aldi berean aipatu zuen gobernuan PSNk «indar gehiago» izatea bilatuko duela.

EH Bilduk eman du jauzi handiena. Duela lau urteko emaitzekin alderatuta, bi legebiltzarkide gehiago izango ditu, eta Geroa Bairen aurretik geratu da, hirugarren. Laura Aznal lehendakarigaiaren arabera, «emaitza sinestezinak» izan dituzte. Hunkituta nabari zitzaion. «Hirugarren indarra gara eta asko handitu gara boto kopuruan».

Aitzitik, Geroa Baik behera egin du. Duela lau urte baino bi jarleku gutxiago lortu ditu. Uxue Barkos lehendakarigaiak onartu zuen ez zirela emaitza onak, baina gobernua osatzeko orduan «funtsezko» izaten jarraituko dutela.

Nafarroa Zurekin koalizioak hiru parlamentari lortu ditu. PPren kasuan, berriz, inkesta batzuk bost edo sei jarleku lortzeko aukera ematen zioten, baina azkenean UPNren boto baliagarriak kalte egin dio, eta hirurekin geratu da. Duela lau urte ez bezala, eskuin muturra Parlamentuan sartu da. Bi ordezkari ditu Voxek.