Albistea entzun

Koronabirusa. ZIENTZIA PENTSALDIAN

Zero COVID: sorgin-gurpiletik ateratzeko proposamena

Ana Galarraga Aiestaran - Elhuyar Zientzia

2021eko otsailak 2

Izurriaren lehen olatuaren ondoren, antzeko estrategiari heldu zioten Europako herrialde gehienek: birusarekin bizitzen ikastea. Estrategia horrek ez du lortu birusa kontrolpean izatea, eta prebentzio-neurrien eta eskubide-murrizketen aldizkako gogortze- eta malgutze-ziklo itsuan sartu du gizartea. Hortik ateratzeko, askok txertoan zuten jarria itxaropena; alabaina, txertaketa-kanpaina hasi orduko, baikorregiak zirela ohartu dira.

Dena ez da kritika eta etsipena, ordea. Badira proposamenak ere; nabarmenena, Zero COVID estrategia. Contain covid ere deitzen zaio (kontrolatu COVID-19a), eta haren funtsa birusaren intzidentzia guztiz txikitzean eta hari maila apalean eustean datza. Birusa desagerraraztea ezinezkoa bada, ahalik eta gutxien egon dadila; agerraldiak berehala geldiarazi daitezela, eta positibo guztiak kontrolatu. Udaberriko konfinamendutik ondorenerako epidemiologoek planifikatu zuten antzera, alegia.

Zenbait herrialdetan lortu dute: Taiwanen, Japonian, Zeelanda Berrian, Vietnamen, Singapurren... Europan, oraingo egoerarekin, askok ezinezkotzat jotzen dute, baina gero eta babes handiagoa du zientzialarien artean. Hain zuzen, Europa osoko zientzialari-talde handi batek dei egin die Europako gobernuei bide hori har dezaten elkarrekin; eta Erresuma Batuan, Irlandan, Alemanian eta Katalunian, besteak beste, tokiko aditu-taldeak sortu dira, proposamena bultzatzeko.

Talde bakoitzak bere jarraibideak aurkeztu baditu ere, funtsean bertsuak dira. Europako zientzialari-taldeak, esaterako, 100.000 biztanleko eta eguneko infekzio-kasu berri bat edo gutxiagoan jarri du helmuga. Herrialde batek baino gehiagok lortu izan du intzidentzia hori une batean edo bestean, eta udaberrirako herrialde guztiak maila horretara iristea proposatu dute.

Hori lortzeko, neurri eraginkorrak hartu beharko lirateke berehala, elkarrekin koordinatuta. Eta kutsatzeak jaitsitakoan, positiboei jarraipen estua egin; eta, agerraldiren bat sortu orduko, azkar eta gogor erantzun.

Proposamenak arrakasta izateko, ohartarazi dute nahitaezkoa izango dela populazioaren talde zaurgarrienei laguntzea (hain justu, haiek dira birusak kalte handien egiten dienak) eta gizarte-arrakala txikitzeko programa sendoak ezartzea.

Horrez gain, komunikazioan ere jarri dute arreta. Izan ere, neurriek arrakasta izateko, ezinbestekoa da herritarren lankidetza. Hortaz, oso garrantzitsua da ondo komunikatzea gizarteari intzidentzia txikia izatearen onurak: osasunean, ekonomian eta gizartean ekarriko lituzkeen abantailak ezagutzeak herritarren motibazioa hobetuko luke, eta elkarkidetasuna sustatu.

Zero COVID helburu handinahia da, handinahiegia epidemiologo askoren iritziz. Are gehiago, inor gutxik uste du SARS-COV-2a desagertuko denik; ezta txertoekin ere. Epe luzera, sasoiko birusa izango dela iragartzen dute. Bitartean, ordea, eta txertoen bidez populazioaren gehiengoa immunizatzea lortu arte, intzidentzia txikitzeak eta hedapena kontrolpean izateak arnasa emango lioke gizarteari. Zero COVID proposamena gizarteratzeak balio beza orain arteko kudeaketa aztertzeko, irtenbideak lantzeko eta eztabaidatzeko, eta gizartearekin batera gobernuei norabide-aldaketa bat eskatzeko, estrategia adostu batekin, eta helburu argiekin. Kontuan hartuta, betiere, krisi hau sindemia bat dela, eta, osasun-krisia ez ezik, soziala eta ingurumenekoa ere barne hartzen dituela.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Azterketak euskaraz: Seaskaren helegitea Paueko Administrazio Auzitegian

Administrazio Auzitegiak heldu den astean erranen du Seaskako ikasleek azterketak euskaraz pasa ditzaketen ala ez

Ekhi Erremundegi Beloki

Seaskak Frantziako Hezkuntza Ministerioaren kontra ezarritako salaketa aztertu dute Pauen, presazko auzian. 2019an EEPk et hiruek izenpetutako hitzarmena ez betetzea leporatu dio ikastolen elkarteak

Lesakako Udaleko webgunea da kalteturiko bat. Irudian, astelehenean, 17:00etan. ©BERRIA

Nafarroako 150 udalek pairaturiko zibererasoa konpontzeak «luze» jotzea litekeena dela esan dute

Edu Lartzanguren

ANIMSA udalen informatika enpresa publikoak «pazientzia» eskatu die kalteturiko udal eta tokiko erakundeei, eta herritarrei. Badira bost egun erasoak hainbat zerbitzua ematea galarazi ziela.

Jaietako indarkeria matxista prebenitzeko gida aurkeztu dute, Gasteizen. ©Raul Bogajo / FOKU

Emakumeentzako jai giro «seguruak» sortu nahi ditu Emakundek

Oihane Puertas Ramirez

«Berdintasunezko jaiak» lortzeko asmoz, festetako indarkeria matxista prebenitzeko gida ondu du Emakundek, Eudel eta Arabako, Gipuzkoako eta Bizkaiko foru aldundiekin elkarlanean. Udalei, jai batzordeei, ostalaritzari, txosnei eta jai ekitaldiak programatzen dituzten kolektiboei zuzendu diete.

Josu Erkoreka, gaur, Eusko Legebiltzarrean ©L. Rico/ Efe

Erkorekak esan du Bilboko hilketen auziak loturak dituela nazioartean

Edurne Begiristain

Eusko Legebiltzarrean agerraldia egion du Segurtasun sailburuak, eta jakinarazi du Ertzaintzaren barruan izandako filtrazioak ikertzen ari direla.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...