«Justizian oinarritutako konponbidea» eskatu du Etxerat-ek

Ekhi Erremundegi Beloki -

2020ko irailak 24

Etxerat elkarteak «arrangura» agertu du euskal presoek bizi duten egoeraren aitzinean. Bereziki azpimarratu du Jakes Esnal, Jon Kepa Parot eta Frederic Haranburu Xistor presoen egoera «gordina». Oroitarazi du aspaldi beteak dituztela legeak baldintzapean aske geratzeko aipatzen dituen irizpideak, eta azken auzietan lehen instantziako epaileek askatasun horren alde egin dutela. «Baina fiskaltza antiterroristak duen blokeo sistematikorako joera konponbiderako oztopo da».

Etxerat-en hitzetan, fiskaltzaren jarrerak ez du soilik presoengan eragiten: senitartekoek bizi behar duten errealitatea «gogortu eta estutu» ere egiten du. «30 urte baino gehiago dira Jakes, Xistor eta Ion Keparen senitartekoek espetxeetara bidaiatzen dutela, esperantzarako helduleku gutxirekin egonik, eta, aurrera begira, amaiera datarik ikusi gabe. Senideak ere bizi osoko zigor batera kondenatuak izan dira», deitoratu du.

Presoen senideek salatu dute «humanoki, politikoki eta sozialki onartezina» dela muturreko egoera hori sostengatzea. «Xantaian eta mendekuan oinarritzen ez diren soluzioak nahi ditugu; justizian oinarritutako konponbideak nahi ditugu».

Halaber, ohartarazi dute pandemiaren erdian «are konplikatuagoa» bilakatu dela presoen eta haien senideen arteko harreman afektibo eta familiarra mantentzea. «Espetxeek aurreikusten dituzten neurriak bakartzea eta isolamendua dira kutsatze kasu baten aurrean. Barruan egingo luketen jarraipenaren kudeaketa ezbaian jartzen dugu, eta, ohiko legez, presoak eta senitartekoak dira galtzaileak». Horregatik, eskatu dute izan daitezkeen askatasun bideei oztoporik ez jartzeko eta larriki eri diren presoak berehala askatzeko.

Esnal, Haranburu eta Parot askatzeko bihar Donibane Lohizunen (Lapurdi) eginen den protestan parte hartzera deitu dute. Bakegileek antolatu dute, 19:00etarako, Luis XIV.aren plazan, 30 urte aski da! lelopean.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Mirentxin gidarietako boluntarioek gidatzen dituzte furgonetak. ©NAGORE ARIN
Azken porturaino

AZKEN PORTURAINO

Maddi Ane Txoperena Iribarren

Euskal presoak bisitatzera joateko, milaka kilometro egin behar izaten dituzte haien senide eta lagunek. Andaluziako Puerto de Santamariako espetxeetara egindako bidaia baten kronika da hau.
Sare Herritarrak atzo Donostiako Kontxa hondartzan eginiko mosaikoa. ©SARE

Olatu bat konponbidearen itsasertzera

Jon O. Urain

Sarek deituta, 600 lagunez osatutako mosaiko bat eratu dute Donostian. Espetxe politika aldatzeko eskatu dute
PPko kideak, atzo, Gernikan. ©LUIS TEJIDO / EFE

Gernikako estatutuak 41 urte bete ditu, aldatzearen aldeko aldarri artean

Gotzon Hermosilla

EAJk eta EH Bilduk «estatus berria» behar dela nabarmendu dute. PPk eta PSE-EEk baino ez dituzte antolatu urteurrena ospatzeko ekitaldiak

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna