EH Bilduk AHTaren lanak gelditzeko eskatu dio Nafarroako Gobernuari

«Hau amaitu beharra dago». Mozio bat aurkeztu du EH Bilduk Nafarroako Parlamentuan, eta eskatu du Alesbes eta Faltzes arteko AHTaren egungo lanak bertan behera uzteko eta adjudikazio gehiago ez egiteko. Ekainean, Europako Kontu Auzitegiak ondorioztatu zuen Europako AHT sarea ez dela eraginkorra, eta, gehiegizko kostuak eragiteaz gain, bidaiari gutxi dituela. Horregatik, EH Bilduk uste du proiektuaren ondorio soziekonomikoak neurtuko dituen ikerketa zorrotza egin behar dela, eta ingurumen arloko eragina aztertu.

Kezkaz ikusi du EH Bilduk Nafarroako Gobernuaren jarrera. Atzo, Manu Aierdi Garapen Ekonomikoko lehendakariordeak aipatu zuen tren korridorea «estrategikoa» dela. Aste hasieran baieztatu zuen Aierdik Madrilekin AHTaren inguruko hitzarmen berri bat lortu nahi duela. EH Bilduko Adolfo Araizek eta Maiorga Ramirezek argi utzi zuten hitzarmen berri batek ez duela ezer aldatuko, eta tren eredu hori «diru xahutzailea» dela, «eraginkortasunik gabea».

UPNk, berriz, Manu Aierdiren agerraldia eskatu du, beste hitzarmen baten aukerari buruz bere posizioa argitu dezan.