Amaitu da pandemia

Dena amaitu da, irabazi egin dugu eta kito. Kalera irten eta maskararik gabeko jendea ikusten dut taldean metro erdira hizketan. Instagram begiratu eta besarkadak zein bilerak ikusten ditut etxe barruetan. Nick Cavek kontzertu handi bat iragarri du Atenasen ekainerako, hiriburuko jaialdia itzuliko omen delako. Tabernetako terrazetan, mahaien arteko distantzia betikoa da berriro: ez dago distantziarik. Oraindik murrizketa batzuk daude indarrean, baina, gero eta gehiagotan, beste alde batera begiratzen dute agintari eta poliziek. Arau-hauslearen arabera, noski, betikoek isunak jasotzen jarraituko dute. Turistak Greziara itzultzen ari dira pixkanaka, eta normaltasuna nahi dute. Ez diezazkiegun oporrak hondatu.

Baliteke esajeratzen aritzea, terrazak eta tabernen barrualdeak itxita egon baitira azarotik maiatzera. Agian orain dena dena baino handiagoa iruditzen zait. Gainera, ni pixka bat gehiegizkotasunez ari naiz; ez naiz taberna baten barruan eseri 2020ko otsailetik. Jendea nekatuta dago, normala da. Hilabete asko dira, eta ondo pasatzeko eta lasaitzeko eskubidea dute. Jakina.

Kezkatzen nauena da pandemia erabaki batek amaitu duela. Pandemiarik ez dagoela erabaki dugu. Grezia, amesgaiztoa hasi zenetik, kasu gehien detektatzen diren bigarren unean dago. Izan ere, azaroan herrialdeko hiri nagusiak berriro konfinatzea erabaki zenean baino intzidentzia metatu handiagoa dugu. Kasu kopuru berberak baina heriotza gehiago: bigarren berrogeialdia iragarri zen egunean hamahiru hildako izan ziren, orain 56-55 pertsona hiltzen dira, batez beste, egunero. Kopuru horrek ez dirudi oso altua, beste herrialde batzuekin alderatuta, baina argi eta garbi adierazten dute osasunaren ikuspegitik amaitu ez den pandemia baten bigarren olatuan gaudela.

Txertaketa-erritmoa Europako beste herrialde batzuetakoaren antzekoa da. Zalantzarik gabe, ez du zerikusirik Estatu Batuetakoarekin, Erresuma Batukoarekin edo Israelgo apartheidarekin—Palestinako Bantustanetako biztanleak baztertu dituzte—. Herritarren % 15 erabat txertatuta daude, eta % 26k jaso dute lehen dosia.

Baina garrantzitsuena ez da hori, dio gobernuak. Garrantzitsuena turismoa da. Greziak aurrea hartu nahi die Espainiar Estatuari eta Italiari, edozein preziotan. Hil behar dutenak hilko dira, hobe zarata handirik egiten ez badute. Gainerakook ospa dezagun pandemia amaitzear dagoela erabaki dugula eta ongi etorri turistak.