Zurekin Nafarroa ezkerreko koalizioa aurkeztu dute
«Oraingoan, garaiz gaude». Hori erran du Begoña Alfaro Nafarroako Ahal Dugu-ko koordinatzaileak, Zurekin Nafarroa ezkerreko koalizio berriaren aurkezpenean. Atzo goizean, Iruñeko Zaldi Zuria jatetxearen terrazan antolatu zuten hitzarmena sinatzeko ekitaldi publikoa, eta aurkezpenean izan ziren, Alfaroz gain, Carlos Guzman Ezkerrako koordinatzailea, Olga Risueño Batzarreko bozeramailea, Txema Noval Burlatako alkate ohia eta Xabier Castro Nafarroako Ahal Dugu-ko Enplegu Arloko arduraduna.
Suspentsea ez da luzea izan, eta berehala ezagutarazi dute taldearen bortz koloreko logoa, txalo artean. Ekitaldi musikatu batean, «itxaroten zen bide berri bat» irekiko dutela xehatu dute. Gizartearen «hutsune» bati emaniko ihardespena izan nahi dute, eta azaldu dute prest daudela erronkari erantzuteko: zazpi ardatz izanen ditu koalizioak, krisiei aurre egiteko. «Feminismoa, ekologismoa, justizia soziala, zerbitzu publikoa, pazifismoa, inklusibitatea eta gizarte eta lurralde kohesioa» dira «oinarrizko balioak», Alfarok jakinarazi duenez.
2023. urtearen xedea aipatu badute ere, heldu den urteko hauteskundeetatik haratago irudikatu dute formazioa, «etorkizuneko proiektu gisa, beste espazio eta pertsonak eraikitzeko».
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
