Madrilek onets ditzan

Jaurlaritzak moldaketak egin ditu ikasketa ez-unibertsitarioetako beka sisteman. Espainiako Gobernuaren helegite bat eragoztea da asmoa: deialdiari «segurtasun juridikoa» ematea.

Arantxa Iraola -

2019ko irailak 25

Ikasketa ez-unibertsitarioetan ari diren ikasleei eta haien familiei laguntzeko beka deialdia onartu du Eusko Jaurlaritzak, hainbat aldaketarekin. Horien xedea da Espainiako Gobernuak helegiterik ez jartzea deialdi horri, eta, hartara, haren «segurtasun juridikoa» bermatzea. Izan ere, Madrilek Jaurlaritzaren beken kontra egin izan du aurretik, eta Auzitegi Gorenaren onespena lortu du, gainera: Jaurlaritzaren deialdien hainbat artikulu ezeztatzea lortu du. Horrelako egoerak berriz izatea saihestu nahi du orain Jaurlaritzak aldaketa horien bitartez.

Onartutako deialdiak 55 milioi euro banatuko ditu derrigorrezko hezkuntzarako, musikako eta dantzako oinarrizko eskoletarako, eta derrigorrezko ikasketen osteko beste hainbat ikasketatan ari diren ikasleentzat eta haien familientzat; tartean daude Batxilergoa eta Lanbide Heziketa. Atzo eman zuen Eusko Jaurlaritzako Hezkuntza sailburu Cristina Uriartek deialdiaren berri. Ez du ezkutatu bekak Madrilen nahien arabera moldatu behar izanak sortu dien ezinegona: izan ere, Jaurlaritzari dagozkion eskumenen «inbasioa» dela uste du. «Interes politiko bat dago estatu osoan bekak berdintzeko». Adierazi du gai horren gaineko kezka hizpide izan dutela Espainiako Gobernuko agintariekin, eta hitzartua dutela Hezkuntza ministro Isabel Zelaarekin propio auzia aztertzeko lantalde bat abiatzea. Espainiako Kongresurako bozetara berriz deitu dute, ordea; ikusteko dago oraindik zer gobernu eratuko den, eta elkarrizketa horiek hasiko diren ere ez dago batere argi zalantzaz josiriko giro horretan.

Jaurlaritzaren asmoa da 55 milioi euro bideratzea beketara, baina baldintzak betetzen dituzten familia guztiek laguntza jasoko dutela adierazi du sailburuak, eta, beharrezkoa bada, diru gehiago jarriko dutela deialdirako: behar duten ikasle guztien eskariak asetzea da Hezkuntza Sailaren asmoa. Jaurlaritzako ordezkariek onartu dute, ordea, Madrilen irizpideen araberako aldaketak ezartzeak ondorio kaltegarriak ekar litzakeela: bekak apalagoak izan litezkeela, eta familia gutxiagok egin ahal izango dituztela eskabideak.

Derrigorrezko hezkuntzaren osteko ikasketetan egin dituzte Espainiako Gobernuaren araberako moldaketak: Batxilergoan, Lanbide Heziketan, musikako eta dantzako oinarrizko ikasketetan, musikako eta dantzako ikasketa profesionaletan, kirol ikasketetan, Arte Plastikoetan eta Diseinuan, eta hizkuntza eskola ofizialetan ari diren ikasleek atzemango dituzte horien ondorioak.

Hezkuntza Sailaren arabera, Espainiako Auzitegi Gorenak Madrili onetsitako helegiteetan argudiatu izan du herrialdeka «desberdintasun handiak» eragin dituztela Eusko Jaurlaritzak onartutako bekek, eta horregatik utzi behar direla deialdi horietako hainbat artikulu ezeztatuta.

Hilaren 30etik

Laguntzak eskatzeko gehienezko errentak moldatu egin dituzte, eta ikasleen bizilekuaren eta emaitzen araberako irizpide berriak ere txertatu dituzte. Eskabideak jasoko dituzte irailaren 30ean hasi eta urriaren 29ra bitartean. Bete beharreko baldintzei buruzko informazio guztia Hezkuntza Sailaren webgunean egongo dela jakinarazi dute.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Jendea terrazetan Bilbon, astelehenean. ©Aritz Loiola/FOKU

651 kasu atzeman dituzte Hego Euskal Herrian

Berria

Bizkaian kasu gehien atzeman diren eguna izan da: 402. Osasun Saila eta Bizkaiko Foru Aldundia arratsaldean bilduko dira egoera aztertzeko.

 ©JON URBE / FOKU

«02:00etan, festak ezin du segitu eremu pribatuetan»

Aitor Biain

Herritarren parte hartze handiagoa eskatu dute ostalariek, ardura guztia beren bizkar izan ez dadin. Ataka estuan direla ohartarazi dute, eta babes ekonomikoa galdegin diote administrazioari, helegitea onartu edo ez.

Donibane Lohizuneko plaza, konfinamendu denboran ©Bob Edme

Donibane Lohizuneko ostatu bat hetsi dute

Ekaitz Etxamendi

Pirinio Atlantikoetako departamenduko prefeturak erabaki du Donibane Lohizuneko (Lapurdi) Le Miam ostatuaren hestea bost egunez, zigor gisa. Neurria beterik, gaur ireki dute berriro.

Osasun langileak PCR probak egitn Donostian, iragan astean. ©Gorka Rubio/FOKU

Getxoko Bikain tabernan eta Gasteizko Sagartoki eta Oh Malbec jatetxeetan izan zirenei proba egiteko eskatu die Jaurlaritzak

Berria

Toki horietan izan zirenek beren osasun etxera edota osasun aholkularitzara deitu beharko dute ordua hartzeko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna