Albistea entzun

Cabacas ez dutela biktima gisa aitortu salatu dute omenaldian

Ekitaldia egin dute Bilbon, haren hilketaren zazpigarren urteurrenean. Helegitea jarri diote epaiari: «Bide judiziala ez da oraindik amaitu»
Iñigo Cabacasen ama Fina Lizeranzu, semea zauriturik suertatu zen lekuan lore eskaintza egiten.
Iñigo Cabacasen ama Fina Lizeranzu, semea zauriturik suertatu zen lekuan lore eskaintza egiten. ARITZ LOIOLA / FOKU Tamaina handiagoan ikusi

Gotzon Hermosilla -

2019ko apirilak 7 - Bilbo

Urtero bezala, omenaldia egin diote Iñigo Cabacasi, duela zazpi urte Ertzaintzak jaurtikitako pilota batek hil zuen leku berean, Bilbon. Aurtengo omenaldia berezia izan da, epaia kaleratu zenetik lehenengoa izan delako, eta aste honetan bertan Eusko Legebiltzarrak onartu duelako Poliziaren gehiegikerien biktimei buruzko legea. Ekitaldian, haren lagunek salatu dute lege horrek ez diola Cabacasi biktima izaera aitortzen —1999ra arteko biktimak baino ez ditu aintzat hartzen—.

«Iñigo ez zen hemen kasualitatez lurrera jausi», esan du Cabacasen lagun Koldo Gutierrezek. «Bota egin zuten; pilota batek akabatu egin zuen. Eta erantzule asko daude egoera lazgarri horren atzean. Gogoratu behar dugu egun, berriki onartu den legearen arabera, Iñigo ez dagoela biktima moduan aitortua. Horregatik gaude hemen».

Iazko azaroaren amaieran iritsi zen Cabacas auziko epaia: akusatutako sei ertzainetatik bakarra zigortu zuten, baina ez du espetxe zigorra bete behar izan. Hori ere gogoan izan dute ekitaldian, eta berretsi dute bide judiziala ez dela oraindik amaitu, familiaren abokatuek helegitea jarri diotelako epaiari.

«Zazpi urte igaro eta gero, hemen gaude, Iñigorenganako maitasunak horrela eskatzen digulako», esan dute. «Inor ez da hiltzen ahazten ez badugu. Eta guk ez dugu Iñigo sekula ahaztuko».

Txalo artean, Iñigoren aita Manu Cabacasek ere hitza hartu du, eta aukera baliatu du zazpi urte hauetan senideen alboan egon direnei eskerrak emateko: «Gure familia ez da oso handia, baina orain esan dezaket zuek ere familia zaituztegula».

Elizegiren deia

Manu Cabacasek esan duenez, omenaldiaren bezperako eguna «oso tristea» izan zen berarentzat eta Fina Lizeranzu emaztearentzat: etxean eman zuten, bakarrik eta oroitzapenetan murgilduta. Baina jaso dituzten mezu ugariak bihotz altxagarri izan zaizkiela aitortu dute. Bat bereziki nabarmendu du Manu Cabacasek: Aitor Elizegi Athleticeko presidente berriarena —Athleticen aurreko zuzendaritza kritikatu dute inoiz, auzi honetan familiarekin hotzegi jokatu duelakoan—. Cabacasek esan du «hunkigarria» izan zela Elizegiren mezua, eta eskerrak eman dizkio.

Manu Cabacasek esan du «tristea» dela «zazpi urteren ostean auzia ez dela amaitu esan behar izatea», eta berretsi du «amaierara arte» jarraitzeko prest daudela. «Guretzat, amaiera da justizia egitea, eta honen erantzuleek ordain dezatela egindakoa». Gero etorri da omenaldiaren unerik zirraragarriena, ohorezko aurreskua dantzatu eta lore eskaintza egin dutenean.

Ekitaldia amaitutakoan, eta kazetariekin berbetan, Manu Cabacasek esan du bere ustez «agindua eman zuena» dela «benetako hiltzailea», eta «hori akusatuen aulkian eseri ere ez» dela egin. Berretsi du beren asmoa ez dela «Ertzaintzaren edo Jaurlaritzaren kontra jotzea, justizia egitea baizik».

Halaber, kritikatu egin du Iñigo Cabacas hil eta sei urte eta erdi geroago eman izana dimisioa Jorge Aldekoa ertzainburu ohiak, «hasiera-hasieratik jakin ez balu bezala han zer gertatu zen».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Bizkaiko Batzar Nagusietan Usansoloren desanexioa bozkatu zen momentuan ©Marisol Ramirez/ FOKU

Galdakaoko Udalak demandatu gisa aurkeztea erabaki du Usansoloko auzian

Berria

Bizkaiko Batzar Nagusiek lurraldeko 113. udal gisa onartu zuten Usansolo, galdeketaren ostean, eta estatuko abokatutzak helegitea aurkeztu zuen. Galdakaoko Udalak demandatu gisa aurkeztea erabaki du, prozesu honetan egindako bidea defendatzeko.

 ©JON URBE / FOKU

«Adostasun berriek ahalbidetu dute bake prozesua»

Irati Urdalleta Lete

Foro Sozialaren bidea ixtear da, baina hor dago eginikoa: hamabi aholkuetatik 11 beteta edo betetzear. Eta egitekoak: adibidez, biktimen «asimetria» gainditzea. Balorazio «ona» egin dute.
 ©MARISOL RAMIREZ / FOKU

«Madrilen berme» mahaian

Jon Ordoñez Garmendia - Xabier Martin

PSE-EEn bide luzea eginikoa da Ares: sozialisten ordezkari 2005etik 2007ra bitarteko bake elkarrizketetan eta Jaurlaritzako Barne sailburu, besteak beste. Karguan zela hil zuen Ertzaintzak Cabacas. 68 urte zituela hil da.

Bake Bideak eta Bakegileak taldeek antolatu mobilizazioa Ipar Euskal Herria blokeatzeko. ©Bob Edme/ Iparla

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.