HIZPIDEAK

Irakaspena

Jon Ordoñez Garmendia -

2019ko otsailak 10
Duela 50 urte, haurrak euskaraz eskolatu nahi zituzten gurasoak behar zituen Seaskak. Orain, euskara nahi duten gurasoak behar ditu haurrak euskaraz eskolatzeko. Euskara salbatu behar zen 1969an, eta dena egiteko zegoen. Egindako bideak erakusten du zer garrantzitsua izan zen orduan euskarazko hezkuntzaren aldeko urratsa egitea Seaskaren sorrera bultzatu zutenek eta aurreiritziekin hautsi zuten gurasoek. Arrakastatsua izan da bidea, eta duela mende erdi zailena izan zitekeena lortua du: euskaldunak euren kulturaz eta hizkuntzaz jabetzea eta euskara bazterretik ateratzea. Azken hamar urteetan %60 hazi dira Seaskako ikasleak, eta joera horrekin, 2030ean Ipar Euskal Herriko ikasleen %20 izateko hurbil egongo dira.

Zoritxarrez, ordea, ezin esan liteke euskara arriskuz kanpo dagoenik 50 urte geroago. Seaskaren bidea ezin oparoagoa izanagatik, erronka berriei egin behar diete aurre irakasleek eta gurasoek euskara salbatu eta haur euskaldunak hezi nahi badituzte. Kontua ez baita euskaldunak izatea, baizik eta hiztunak izatea, euskal hiztunak. Euskaraldiak modu berritzaile batez erakutsi zuen abenduan zeintzuk diren Euskal Herri osoan euskarak dituen hutsuneak, gaur egungo aurreiritziak, hizkuntza azpiratu bateko hiztunak barneratuak dituen mugak. Horri aurre egiteko formula aspaldi asmatu zuten Seaskaren sortzaile eta gurasoek, 1969an: engaiamendua. Irakaspen hori ere eman du Seaskak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna