Albistea entzun

Espainiako Gorteetarako hauteskundeak. Hego Euskal Herria

«Ongizatea» eta «autogobernua» bermatuko dituela dio PSEk

«Inboluzioari» aurre egiteko bermea da PSOE, Zelaa eta Elorzaren ustez. Pablo Iglesiasek sozialistei eskatu die boza, Bilboko ekitaldian
Isabel Zelaa Espainiako Gobernuko bozeramailea eta PSEko Arabako hautagaia atzo, Guardian (Araba).
Isabel Zelaa Espainiako Gobernuko bozeramailea eta PSEko Arabako hautagaia atzo, Guardian (Araba). BERRIA Tamaina handiagoan ikusi

Edurne Begiristain -

2019ko apirilak 21

Espainiako Gorteetarako bozetan eskuineko alderdiek irabaziz gero «ongizate estatuan, eskubide sozialetan eta autogobernuan» atzerapausoak eman daitezkeela ohartarazi zuen atzo PSE-EEk. Isabel Zelaa Arabako zerrendaburuak, Odon Elorza Gipuzkoakoak eta Patxi Lopez Bizkaikoak mezu hori zabaldu zuten. Hirurek nabarmendu zuten datorren igandeko bozetan bi aukera baino ez daudela: eskuin muturraren «inboluzio politikoa» babestea ala «ongizatea eta autogobernua» defendatzea. Azken aukera hori Pedro Sanchezen gobernu baten bidez lortuko dela adierazi zuten.

Arabako Errioxan izan zen Zelaa, Guardia herrian. Hurrengo bozen garrantziaz ohartarazi zuen, eta, politika sozialak bermatu ahal izateko, sozialistei botoa ematera animatu zituen herritarrak : «Gizarte politiketan atzera egin nahi duten hiru eskuinen aurrean, PSOEk ongizate estatua blindatuko du, demokrazia leheneratuko du, eta zerga diziplinari eutsiko dio, defizita eta zorra murrizteko bidea delako».

PSOEren gobernuari esker igo da gutxieneko soldata 900 euroraino, eta KPIarekin igo dira pentsioak, Zelaaren arabera. Halaber, gogora ekarri zuen PSOEk agindu duela bozak irabaziz gero pentsioak Espainiako Konstituzioan bermatuko dituela. Zelaak ziurtatu zuen norabide berean lan egiten jarraituko duela Sanchezek aurrerantzean, Moncloara iristen bada: «Orain arte garatutako politika sozialek apirilaren 29tik aurrera idatziz joango den liburu baten hitzaurrea baino ez dute osatu».

Hezkuntzari dagokionez, berriz, LOMCE legea indargabetuko dutela ziurtatu zuen Zelaak, ikasleen artean «bazterketa» sortu duelako. Horrekin batera, lanbide heziketa bultzatzeko konpromisoa hartu zuen, hura «lehen mailan» kokatzeko.

«Guk ala haiek»

Eskuinaren mehatxuaz ohartarazi zuen Patxi Lopez Bizkaiko zerrendaburuak, Castro Urdialestik (Kantabria, Espainia): «Guk ala haiek irabaziko dute». Lopezen esanetan, datorren igandekoak «inoizko bozik garrantzitsuenak» izango dira, eskuin muturra panorama politikoan agertu delako. Haren ustez, «zirt edo zart» egin beharko da, eta «erdibideko botoek» ez dute balio, «ez EAJrenak, ezta Madrilen eragin nahi dutela diotenenak ere».

Gogoratu zuen urteetan eskuina haziz joan dela Europan, proposamen «antisozialak eta antidemokratikoak» eginez, eta beti pentsatu dela olatu hori ez zela hona iritsiko. «Baina hemen daude, eta, Europako beste herrialdeetan eskuin muturra baztertu eta gaitzesten den bitartean, hemen harekin itunak egiten dira, eta haren ideologiarekin bat egiten dute». Egoera «larria» dela eta eskuinari aurre egin beste aukerarik ez dela uste du Lopezek.

Besteak beste, gogor kritikatu zituen Vox alderdiak gizarte politiketan dituen proposamenak. Aberastasun handienei zergak kentzeko eta bestelako zergak jaisteko proposamena egin du Voxek, eta hezkuntza sistema, osasun arloa eta pentsioak pribatizatu nahi ditu. Neurri horiekin ongizate sistema «hondoratuko» dela eta «itun soziala» apurtuko dela ohartarazi zuen Lopezek. «Banderek ez dute herri bat definitzen. Herri bat definitzen dute bere balioek, printzipioek eta zerbitzu publikoek». Eskuineko alderdiekin hori dena «arriskuan» dagoela berretsi zuen Bizkaiko zerrendaburuak.

Inkesten arabera, sozialistek irabaziko dituzte Gorteetarako hauteskundeak, baina Elorza Gipuzkoako zerrendaburua ez da fio: «Ez gara fidatu behar, PPk, Ciudadanosek eta VOXek batzeko duten aukera benetakoa baita». Hori hala, boto bakar bat «ez nahasteko» eskatu zuen Elorzak: «Euskal autogobernua bermatzeko eta PPk lapurtutako eskubide sozialak berreskuratzeko, eta herri honek ez egiteko atzera berrogei urte».

Iglesiasen eskaera

Pablo Iglesias Unidas Podemoseko idazkari nagusia, berriz, Elkarrekin Podemosen Bilboko ekitaldian izan da, eta eskaera egin die sozialistei alderdi moreari botoa emateko, haren esanetan Elkarrekin Podemosen alde bozkatzea baita «ezkerreko gobernu bat bermatzeko modu bakarra». «Badakit euskal sozialistak gure programarekin ados daudela», nabarmendu du. Roberto Uriarte Espainiako Kongresuko bozetarako Elkarrekin Podemosen zerrendaburuarekin eta Lander Martinez Elkarrekin Podemoseko idazkari nagusiarekin izan da Iglesias Otxarkoaga auzoan egindako ekitaldi horretan, eta ohartarazi du Unidas Podemos izango dela hauteskundeetako «sorpresa». «Espainiak ez du zertan izan fatxek menderatutako herri bat».

Martinezek ere ohar egin du, «alderdi moreak bultzada ez badu ematen» PSOEk «kolore laranja» hartuko duela eta Ciudadanosengana hurbilduko dela: «Soilik gure indarrak gera ditzake hiru eskuinak».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Bizkaiko Batzar Nagusietan Usansoloren desanexioa bozkatu zen momentuan ©Marisol Ramirez/ FOKU

Galdakaoko Udalak demandatu gisa aurkeztea erabaki du Usansoloko auzian

Berria

Bizkaiko Batzar Nagusiek lurraldeko 113. udal gisa onartu zuten Usansolo, galdeketaren ostean, eta estatuko abokatutzak helegitea aurkeztu zuen. Galdakaoko Udalak demandatu gisa aurkeztea erabaki du, prozesu honetan egindako bidea defendatzeko.

 ©JON URBE / FOKU

«Adostasun berriek ahalbidetu dute bake prozesua»

Irati Urdalleta Lete

Foro Sozialaren bidea ixtear da, baina hor dago eginikoa: hamabi aholkuetatik 11 beteta edo betetzear. Eta egitekoak: adibidez, biktimen «asimetria» gainditzea. Balorazio «ona» egin dute.
 ©MARISOL RAMIREZ / FOKU

«Madrilen berme» mahaian

Jon Ordoñez Garmendia - Xabier Martin

PSE-EEn bide luzea eginikoa da Ares: sozialisten ordezkari 2005etik 2007ra bitarteko bake elkarrizketetan eta Jaurlaritzako Barne sailburu, besteak beste. Karguan zela hil zuen Ertzaintzak Cabacas. 68 urte zituela hil da.

Bake Bideak eta Bakegileak taldeek antolatu mobilizazioa Ipar Euskal Herria blokeatzeko. ©Bob Edme/ Iparla

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...