Etxerat: «Sakabanaketak eta urruntzeak ez dute inoiz justifikaziorik izan»

Euskal presoen senide eta lagunek milaka kilometro egin behar izaten dituzte haiei bisita egiteko, eta bidaia horiek arriskuz beteak daudela gogorarazi zuten atzo Urtzi Errazkin eta Patricia Velez Etxerat-eko bozeramaileek Hernanin egindako agerraldian (Gipuzkoa). Duela 33 urtetik martxan dira sakabanaketa eta urruntzea, eta, beraz, «salbuespenezko espetxe politika» eteteko galdea egin diote Madrili: «Ez dute inoiz justifikaziorik izan».

Oroitu dute Pedro Sanchez Espainiako Gobernuko presidenteak espetxe politikan aldaketak iragarri zituela 2018ko ekainean, baina salatu dute ordutik ez dela aldaketarik izan: «83 asteburu igaro dira, bidaiatzera behartuta gaudenontzat arriskuz beterikoak». Tarte horretan, hemezortzi istripu izan dituzte euskal presoen senide eta lagunek, horietatik hamasei Espainiako Estatuan; hiru kaltetu izan dira. Horrek sortzen dien sufrimendua politikoki erabiltzea leporatu diote Madrili: «Senide izateagatik sufritzera kondenatzen gaituzte».