Albistea entzun

DARWIN ETA GU

Gau bat Sandokanekin

Jose Mari Pastor -

2021eko otsailak 27

Bonboi kutxa bat zen bizitza, Forrest Gumpentzat; kondoi kutxa bat da insomnioaren giltza, zuretzat. Festa dute ondoko gelan. Festa, astearte batean. Gauerdia da, eta astrapalak ez dizu lorik egiten uzten. Batez ere, itxuraz oheburuak hormaren kontra jotzen dituen kolpe gero eta ozenagoek. Eta neska baten plazerezko intziriek.

Festa, sexu festa. Entzungailuak jarri dituzu sakelakoan eta Rock Antenne irratia bilatu. Zaratak eta hotsak itoko ditu rockaren ahotsak? Amorratzen hasi zara eta horrek berpiztu egin zaitu. Lasai, laster amaituko da. Oraindik ez dakizu txingitxanga gau osoan luzatuko dela, aldamenean Sandokan ari dela, jo eta su, gelditu gabe.

Telebistan ikusitakoa errepasatzen hasi zara, zeure burua entretenitzeko: Katalunia, pandemia... ETBn birusari buruz hitz egin dute hiru lagunek. 24h katean harritu egin zaitu hizkera frankista duen aurkezleak, Eusko Jaurlaritzari el gobierno regional deitu dionean. Erregioa gara. Europako eredu autonomiko garatuena omen duen estatu ia federaleko telebista publikoak ez du estilo libururik, EAE erregiotzat jotzea debekatzen duenik? Irratiko musika ozenago jarri duzu, baina badirudi horrek Sandokan indartu duela, «I want it all, I want it all, I want it all, and I want it now», hotsak, oihuak, biziagoak baitira. Eta orduan gaua luzea izango den errezeloa izan duzu, hobe duzu bere horretan utzi, let it be, ez odol txarrik egin.

Bete-betean asmatu duzu. Eta berriro ernegatu. Hiruretan korridorera irten zara eta hiru danbada eman dituzu atean. Alferrik. Nekaezina da Sandokan. Laurek jo dute eta lanean segitzen du Malaysiako tigreak, jardunean. Non ibiliko da orain? Malakako itsasarte epelean barrena ala oraindik Kinabalu malkartsuan gozatzen? Telebistan Sandokan seriea eman zutenean abesten zenuten kanta zozoa etorri zaizu burura: «Sandokan, Sandokan, tiene la ..... como un tobogán». Eta Kabir Bedi aktorea, Sandokan, Madrilgo kaleetan korrika, atzean andre saldo bat zuela, «zure ume bat nahi dugu!» oihuka, su uterinoak hartuta. Ondoko gelako neska hamaika emakumeren ametsa betetzen ari da, bere bularrak Sandokanen besoen azpian bilduak. Edo modu ahaldunduago batez: bere izterrak Sandokanen gerriaren gainean kiribilduak. Ohea ere boterearen gudu-zelaia baita, Josep Vicent Marquesek liburu hartan azaldu zuenez.

Inbidia puntu bat ez ote duzun pentsatu duzu. Garrantzia kendu diozu: nork ez du halako gau bero likitsa izan? Hala ere, zu beste aldean zaude orain. Gazteagoa zinenean gertatua oroitu duzu. Pisuan bisitan zegoen neska batek zarata iluna eta serenata lizuna entzun zituen gau batean. «Horrek oso ondo egiten du», esan zion goizean bikotekideari. Eta gizonak asaldatuta moztu zuen, «ixo!», macho urguilerian min. Nolaz onartuko zuen neska-lagunak beste tipo baten abilezia eta potentzia sexualak txalotzea bere aurrean? Eta ikasle garaiko beste eszena bat piztu da zure buruan: pisuko lagun bat besteen neska-lagunei errepasoa ematen, «ederra da. Ondo tiratzen du?». Harik eta behin, nazka-nazka eginda, aurrean zuen mutilak haren neskak kristoren izterrak zituela esan zion arte. Orduan altxatu eta ohera joan zen ahozabala, sutan: «Pasatu egin zara». Gizonak.

Ohean geratu zara, esna, musikari adi, badakizulako, itxura hartu diozu, Sandokan ez dela geldituko: bostak, bost eta erdiak, seirak... eman eta eman segituko du. Azkenean, zazpiak aldean bukatu du saioa. Horretaz konturatu eta jaiki egin zara, aurreikusi baino ordu erdi lehenago. Telebista piztu duzu, telefonoko rock musika ere entzungai jarri duzu, oso altu. Eta jadanik inoiz erabiltzen ez duzun ile-lehorgailua ere entxufatu duzu bainugelan, baina 316 gelatik ez da kexarik iristen. Sandokan eta neska zoriontsua lo daude, antza. Eta alde egin duzu, etsita. Ezin duzu Sandokan izorratu, soilik madarikatu. Kabir Bedi, Kabir Bedi, zure txirrista herdoil bedi. Hoteleko atearen ondoan gizon bat erretzen ari da. Eguna ez du oraindik argitu.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

EH Baik elkarretaratzea egin zuen atzo goizean, Euskal Hirigune Elkargoaren egoitza aitzinean. ©GUILLAUME FAUVEAU

Bizilekuen Tokiko Programa onetsi du Euskal Elkargoak

Ekhi Erremundegi Beloki

Bideokonferentziaz egin dute Euskal Hirigune Elkargoko batzarra, osasun egoeraren ondorioz. 630 milioi euroko aurrekontua onartu dute hautetsiek, inbertsiorako 160 milioi euro atxikita

Aitor Esteban EAJko diputatua, Espainiako Kongresuan. ©CHEMA MOYA / EFE

Martxorako agindutako eskumenak ez ditu uda aurretik jasoko Jaurlaritzak

Jon O. Urain

Martxorako agindutako eskumenak ez ditu uda aurretik jasoko Jaurlaritzak. EAJk izurriari eta Madrilgo bozei egotzi die atzerapena

Ander Iriarte eta Paco Etxeberria, dokumentalaren grabazioan, joan den larunbatean. ©JON URBE / FOKU

Grabaketak amaituta, azken lanetan da 'Krask soinua'

Jon O. Urain

Grabaketak amaituta, azken lanetan da 'Krask soinua', 1960-2014 aldiko torturak jasotzen dituen txostenean oinarritutako dokumentala. Tratu txarren adiera «sofistikatua» hartu dute ikergai, horien «bilakaera horrelakoa izan delako».

Puerto I eta II espetxeak, joan den urrian. ©NAGORE ARIN

Herrera de la Manchan ez da jada euskal presorik, eta laster Puerto Ien ere ez da izanen

Maddi Ane Txoperena Iribarren

Hiru euskal preso hurbilduko dituztela iragarri dute Espainiako Espetxe Erakundeek: Fernando Elejalde Tapia Puerto Ietik Mansillara mugituko dute, Iñigo Vallejo Franco Dueñasetik Duesora eta Garikoitz Etxeberria Goikoetxea Sevilla IItik Dueñasera.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna