Justizia administrazioan akordioa lortu dute ELAk, LABek eta Jaurlaritzak

ELAk eta LABek akordio bat egin dute Eusko Jaurlaritzarekin, justizia administrazioko langileen lan baldintzen inguruan. Bi sindikatuek batzarrak egin zituzten atzo langileekin Araban, Bizkaian eta Gipuzkoan, akordioaren xehetasunak azaltzeko, eta batzar horietan akordioa berretsi zutenez, bertan behera utziko dituzte greba mugagaberako deialdia eta gaur Bilbon egitekoa zen manifestazioa.

Lortutako akordioaren arabera, lan baldintzak administrazio orokorreko gainontzeko langileak dituztenekin parekatuko dira, eta soldatak %13 igoko dira. Igoera horren erdia akordioa sinatzeaz batera gauzatuko da, eta beste erdia datorren urtarrilaren 1ean. Genero indarkeriaz arduratzen diren epaitegietako langileentzako sari osagarri bat ere lortu dute: hori zen bi sindikatuen eskaera nagusietako bat. Ibilbide profesionalari dagokion sari osagarria, berriz, aurrerago negoziatuko dute.

ELAko Josu Simalek esan duenez, akordioa «oso ona» da, eta langileak zoriondu ditu lortutakoagatik. «Edonola ere, argi utzi behar da hau borrokaren ondorio dela», zehaztu du. «Grebarik egon ez balitz, Jaurlaritzak jarraituko zukeen lan baldintzak administrazioko gainerako langileenekin parekatu gabe».

LABeko Loreto Cobo ere pozik agertu da, eta esan du akordioak «langile gehienen itxaropenak» gainditzen dituela.

Hiru herrialdeetan 2.400 langile aritzen dira justizia administrazioan. ELAk eta LABek ordezkaritza sindikalaren gehiengoa osatzen dute.

CCOOk grebari eutsiko dio

Justizia arloko gainerako sindikatuak ere, hots, CCOO, UGT, CSIF eta STAJ, greban daude, baina haien deialdia Espainia mailakoa da, eta Espainiako Justizia Ministerioa interpelatzen dute. CCOOk jadanik iragarri du greba deialdiari eutsiko diola.

CCOOko Justizia arloko Javier Zamorak salatu du Jaurlaritzak ELA eta LAB baino ez dituela aintzat hartu negoziazioetan: «Behin baino gehiagotan esan dute bazutela ordezkaritza sindikalaren parte batekin akordioa lortzeko aukera, gainerakoak baztertuz». Halaber, salatu du akordioari buruzko xehetasunik ez dietela eman. «Guk greban jarraituko dugu onuragarria izango den akordio bat lortu arte kolektibo osoarentzat», azaldu du.