EAEko eskoletako sukalde eta garbiketako 480 langile publiko egonkortuko dira
Eusko Jaurlaritzak akordioa lortu du ELA, UGT eta CCOO sindikatuekin, eskoletako sukaldeetako eta garbiketako langileak egonkortzeko. Hezkuntza Sailak atzo iragarri zuenez, 480 lanpostuko lan eskaintza publiko bat abiatuko du bere menpeko beharginentzat; hau da, ikastetxe publikoetako funtzionarioei eragingo die. Meritu lehiaketa bidez eskainiko ditu postuok: langileen esperientzia eta bestelako merezimenduak hartuko dira kontuan. Abenduan emango ditu Jaurlaritzak egutegiari buruzko xehetasunak.
Negoziazio mahaiaren gehiengo sindikalarekin jorratu du auzia gobernuak, eta hortik kanpo geratu da LAB. Hain zuzen, akordioa erdietsi baino ordu batzuk lehenago, agerraldia egin zuen sindikatu horrek, Jokin Bildarratz sailburuari eskatzeko egin dezala «jangelen aldeko benetako apustua». LABen ustez, Hezkuntza Sailak baliabide gehiago jarri behar ditu jangela «seguru eta kalitatezkoak» izateko, eta, gainera, Jaurlaritzari dagokio jangelen funtzionamendu arauak ezartzea —zerbitzua azpikontratatuta egon ala ez—, eta bertan ezartzea ratioak edota langileen funtzioak.
Greba babesteko deia
Biharko Araba, Bizkai eta Gipuzkoako ikastetxe publikoetan deitutako greban parte hartzera deitu dituzte ELAk, LABek eta Steilasek hezkuntzaren arloko langileak. Hiru sindikatuok elkarretaratzea egin zuten atzo Gasteizen, Eusko Legebiltzarraren aurrean, bertan lantzen ari diren Hezkuntza Legea aldatzea galdegiteko. Eskola publikoa ardatz izateko, euskara erdigunean jartzeko eta segregazioari aurre egiteko eskatuko dute lanuzteetan.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
