Albistea entzun

ENBAXADA BILA

Maisua eta maistra

Martxelo Otamendi - BERRIAko zuzendaria

2020ko maiatzak 17

Gustura ospatzen dira beti lagunen urtebetetzeak, eta are gusturago gaur lagunak direnak lehenago irakasle izan badira. Hori izan zaretelako, Vicent eta Assumpcio, kazetari katalan eta katalan ez garenon irakasle.

Etorkizuna nondik zetorren igartzeko trebetasuna eduki zenuten duela 25 urte, paperezko komunikabide handiak erosotasun egoeran egonda, dirutza handiak irabazten zituztenean. Aitzindari izan zineten komunikaziorako baliabide teknikoak oraingoak baino askoz urriagoak zirenean; gaur segundo batean egiten duguna egiteko orduak behar baitziren garai haietan.

Mende laurden honetan erreferentzialtasun bikoitza eduki duzue: teknologikoa eta kazetaritzakoa. Hurrengo urtean zer egin behar zen jakiteko zuen webgunera joan beharra zegoen, eta joan beharra dago. Trebetasun berezia eduki duzue, zuek eta gu bezala, larre motzean gabiltzan hedabideentzako programa merke eta eskuragarriak erabiltzen. Hori guztia estrategia komertzial egokiarekin batera, lurretik oso gertu landutako estrategiarekin.

Informatiboa izan da bigarren erreferentzia. Ez da egongo Katalunian zuen lantaldearen tamainarekin, informatiboki, horren eraginkorra izango den komunikabiderik. Oso argi eduki duzue beti konpromisoa zuen herriarekin, jendearekin, hizkuntzarekin, kulturarekin... Pentsatuko dute gure irakurleek elkarri xaboia ematen ari garela, baina ez naiz hau esan gabe geratuko: Kataluniako prozesua deitzen dioguna ez zen berdina izango Vilaweb eta berau egiten duten langileak gabe.

Pena izan da mende laurden hau merezi bezala ospatzeko aukera eduki ez izana. Etorriko dira fisikoki gertuago egoteko egunak, eta ospatuko dugu. Zorionak gure herrian segitzen zaituztetenen partetik.

Bizitza luzea Vilaweb-i.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.