Albistea entzun

ELE

Errua eta meritua

Oier Aranzabal -

2020ko abuztuak 7

Duela hiru hamarkada, sortu nintzenean, mundua handiagoa zen. Dena zegoen zegokion lekuan.

Bilbo herdoila zen, zikina eta garabiz betea eta Zarautz erdia bidetxur batek lotutako baratzeak. Argazki kamerekin ateratzen genituen argazkiak eta zinemak bostehun pezeta balio zuen. Kaligrafia ona izatea ezinbestekoa zen gure etorkizunerako eta EAJk gobernatzen zuen Jaurlaritzan.

Pandemiak kolpetik jarri gaitu XXI. mendean. Bi hilabetean hamarkada bat egin dugu aurrera. Herrestan eraman ditu gure zaharrak, eta haiekin pentsakera, ohitura eta bizimodu baten azken kondarrak. Ia dena aldatu da, baina, EAJk dagokion lekuan jarraitzen du. Eta nago, irauteko ez duela Manex Mantxolak asteazkenean orrialdeotara ekarri zituen Khrustxoven eskutitzen beharrik izan. Nahikoa izan duela dena lekuz kanpo dagoen mundu txiki honetan, XX. mendeari lotzen gaituen hari xinglea izatearekin.

Sareetako oihanean egunero irakurri dezakegu EAJk zeinen gaizki egiten dituen gauzak. Zaldibarren zeinen gaizki kudeatu zuen dena. Osakidetzako afera, koronabirusarena, EiTB eta nahi duzun guztia. Denaren errua egozten zaie jeltzaleei, baina ahobiko labana da erruarena. Egiten duenak baino ezin baitezake errua izan eta egiten duenarena baita beti meritua ere.

Ezein proiekturen sinesgarritasunari ez dio batere mesederik egiten etengabe jeltzaleen gabezia eta maluren inguruan aritzeak, norbere bertute, proposamen eta proiektuak azaldu beharrean.

Horrenbeste jendek bozkatu badie, akaso —deituidazu inozo— gauzak horren gaizki egiten ez dituztelako izango da. Edo hori, edo okerragoa dena, jendeak ez duelako sinesten inork gauzak hobeto egin ditzakeenik.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...