Migranteen bila, argazkitarako

«Migrazio ilegalaren» kontra Frantziako eta Espainiako polizia zerbitzuek duten elkarlana erakusteko propaganda operazioa egin zuten atzo arratsaldean Irun eta Hendaia artean.
Polizia ezberdinak, Biriatuko ordainlekuan, atzo.
Polizia ezberdinak, Biriatuko ordainlekuan, atzo. GUILLAUME FAUVEAU Tamaina handiagoan ikusi

Ekhi Erremundegi Beloki -

2020ko urtarrilak 23

Azken hilabeteetan Irun (Gipuzkoa) eta Hendaia (Lapurdi) arteko ordainlekutik iragan denak harridura handia izanen zuen atzo arratsaldeko operazioa ikusita. Egunerokoan, Frantziako hiruzpalau polizia egoten dira; tarteka, aduanak. Atzo, ehun agentetik gora mobilizatu zituzten: Frantziako eta Espainiako Poliziak, Jendarmeria, eta Guardia Zibila.

Ordua 15:00etarako emana zuen Pirinio Atlantikoetako prefeturak, «migrazio ilegalaren kontrako operazio koordinatuaren»berri emateko. Espainiako eta Frantziako polizien elkarlana erakusteko propaganda operazioa, beste gisa batez errateko. Kolore ezberdinetako poliziak, uniforme garbitu berriarekin, kontrol anitzetan ohikoa ez den sinpatiarekin, kameren aitzinean posatzen. Gidariari paperak itzultzeko momentuan geldialdi bat egin du polizia batek, kamerek angelu ezberdinetatik harrapatzeko aukera izan dezaten. Itxura zaindu behar da, gero.

«Gero eta kontrol gehiago» egiten dituztela adierazi du Christian Vedelagok, Pirinio Atlantikoetako prefetaren kabineteburuak. Euskal kostaldea «pasaia leku inportantea» dela azpimarratu du, «bereziki Afrikatik datozenentzat». «Pribilegio hori Ekialdeko Pirinioetako gure lankideekin partekatzen dugu; haiekin elkartu beharrean gara ere, migrazio ilegalaren kontrako politika publikoan diharduten zerbitzuen koordinazioa hobetzeko».

Gerora, horrela esplikatu dio beste kazetari bati: «2018an gorakada handia izan zen, Mediterraneoko eta Europa erdialdeko bideak oztopatu zituztelako. Migranteen artean mezua pasatu zuten, telefonoak baitituzte migranteek. Beldur handia izan genuen... Bueno, beldurra, baliabide eta polizia kopuruagatik. Baina geroztik orekatu da».

2018ko udazkenean ireki zutenetik, Baionako Pausa zentroan 10.000 migranteri egin diete harrera. Denak edo gehienak, Espainiako Estatuko migrazio lerroetatik iraganak. Muga pasatzea ekidin ordez migranteak arrisku gehiago hartzera bultzatzen ote dituzten galdetuta, ezetz dio Vedelagok. «Frantziako eta Europako legeak aplikatzen ditugu. Asilo eskaera egin dezaketenei harrera egiten die Frantziak».

Berriki eskuratu duten azken jostailua erakusteko ere baliatu dute agerraldia: drone bat. Kamera termikoaren bidez, gauez ere muga eta inguruak kontrolatzea ahalbidetzen diela azaldu du Vedelagok. Metro batzuez igo da tresna, argazkilarien klik-klik soinuak tapatuz. Nortasun agiriak egiaztatzeko furgoneta berezi bat ere erakutsi dute, «teknologia biziki garatuarekin».

«Truke sistema»

Irun eta Hendaia artean Frantziak itzulketa irregularrak egiten dituela salatu zuten 2018an zenbait elkartek. Beste gisa batean aurkeztu zuen mugako poliziaren zuzendariak atzo: «Truke sistema bat dugu, pertsona bati lurraldean sartzea ukatzen diogularik Espainiako Poliziaren esku uzteko». Atzo ez zen migranterik pasatu ordu horietan. Ausartenak, gaur entseatuko dira berriz.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Osasun langileak PCR probak egiten Donostiako Okendo kultur etxean, ostiralean. ©Gorka Rubio/FOKU

499 positibo atzeman dituzte Hego Euskal Herrian

Berria

Bizkaian behera egin dute kasuek: 211 positibo izan dira. Neurriak indartzearen alde agertu dira hiriburuetako alkateak.

Neurri bereziak dituen taberna bat, Donostian. ©Gorka Rubio / Foku

Bizkaiko eta Gipuzkoako ostalariek salaketa jarriko dute gaueko aisialdia mugatzearen aurka

Andoni Rekondo Izagirre

Uste dute «neurrigabea» dela 01:30ean ixteko agindua, eta laguntza ekonomikoak galdegin dituzte.

Bizkaiko zahar etxe bateko egoiliarrak paseoan. ©Marisol Ramirez/FOKU

Bilboko zahar etxe bateko zortzi egoiliarrek positibo eman dute

Olatz Esteban Ezkati-Irati Urdalleta Lete

Gasteizko zahar etxe bat eta Mutrikuko eguneko zentroa itxi egin dituzte.

 ©Raul Bogajo / Foku

Lanbidek Zaramagako eta Laudioko bulegoak itxi ditu, bi langilek positibo eman dutela eta

Andoni Rekondo Izagirre

Bulegoetako gainerako beharginak ere etxera bidali dituzte berrogeialdia pasatzera. Bitartean, tramiteak webgunearen bitartez egin ahal izango dira.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna