Oihana Elduaien Uranga.
HIZPIDEAK

Gaur da atzo; hemen da han

2023ko maiatzaren 27a
00:00
Entzun
Etorkizuna gaur da. Biharko udal eta foru hauteskundeetan etorkizuna erabakitzen da. Nork hartuko dituen erabakiak Nafarroako Legebiltzarrean, Araba, Bizkai eta Gipuzkoako foru gobernuetan eta lau lurralde horietako udaletan. Eta, horren arabera, zer-nolako gizarte eta lekuak nahi ditugun. Etorkizuna. Hala ere, aurrera baino gehiago begiratu dute atzera hainbat hautagaitzak. ETA, etakide ohiak, preso ohiak...

Eta kanpainako déjà vu-aren erdian etorri da Espainiako Auzitegi Gorenaren erabakia, Galder Barbadori eta Aitor Zelaiari lau urteko zigorra berrestekoa. «Material lehergarriak erabiltzea» leporatuta atxilotu zituen Ertzaintzak, 2019an. «Garaiz kanpo» egindako operazioa izan zela salatu zuten orduan bi gazteek, eta «militante politiko izateagatik» zigortu dituztela. Hala esan zuen Zelaiak 2021ean BERRIAko elkarrizketan: «Askok tematuta jarraitzen dute gure herria iraganera kateatuta mantendu nahian».

Eta hala dirudi. Izan ere, gaur, hemen, beste hauteskunde batzuk ari dira lehiatzen batzuk: urtea amaitu aurretik egingo diren Espainiako Kongresukoak. Eta hemen balio handirik ez duten mezuek balioa dute oraindik han. Harrigarria dena da hemengo hautagai batzuk ere joko horretan sartzea. Etorkizuna iraganean jartzea.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.