'De Miguel auzia': kitatzeko zorrak

Hamar eguneko epean espetxera sartu beharko dute De Miguel auziko lau zigortuek. Bukatu zaizkie helegiteak jartzeko aukerak, eta Jaurlaritzari amaitu zaio Alfredo de Miguelek eta Koldo Otxandianok bere menpeko enpresetan kontratupean jarraitzeko aitzakia.

Luze joan da EAJrekin lotutako politikariak protagonista izandako ustelkeria kasua. Agerian geratu dira kontu asko, eta kitatzeko zor batzuk. Besteak beste, kasuan zigortuak izan direnekin erakundeek eta EAJk erakutsi duten zuhurtziaren eta fintasunaren falta sumatu da, esate baterako, ustelkeria trama hau agerian utzi zuen Ainhoa Alberdi enpresariarekin izandako tratuan.

Alberdiri aitortza eta eskertza egin beharko lioke administrazioak, diru publikoak bidegabe erabiltzen zituen ustelkeria trama antolatu horretako arduradunak justiziaren esku jartzea ez zelako posible izango Alberdik salatzeko ausardia izan ez balu. Hori, gainera, garesti atera zaio salatzaileari. Administrazioaren kontratuak jasotzeko betoa pairatu du kasua salatu zuenez geroztik, eta Bizkaiko Ogasunak ikuskaritza fiskal bat egin zion epaiketa baino egun gutxi lehenago. Alberdik oso urte gogorrak pairatu ditu, eta, publikoki, behintzat, ez erakundeek eta ez EAJk ez dute babestu. Badute kitatzeko zor bat erakundeek zuzen jokatu zuen emakume batekin.