Albistea entzun

Hezkuntza. PISA txostena. Begoña Pedrosa. Huheziko dekanoa

«PISAko datuekin oso zaila da esatea hobetu dugun ala atzera goazen»

PISA txostenak aurten erakutsi dituen emaitzak onak direla esan du Begoña Pedrosak, baina nabarmendu du «argazki partziala» dela: besteak beste, ez dituelako neurtzen ikasleen konpetentzia guztiak.
JOSU TXINTXURRETA Tamaina handiagoan ikusi

Maite Asensio Lozano -

2019ko abenduak 4

Gehiegizko arreta eskaintzen zaie PISA txostenaren emaitzei, Begoña Pedrosa Huheziko dekanoaren ustez (Areatza, Bizkaia, 1975). Hamazortzi urte daramatza Mondragon Unibertsitateko Humanitate eta Hezkuntza Zientzietako Fakultatean lanean, eta orain sei urte hartu zuen haren gidaritza. Egunotako mezu nagusien ezkortasunetik ihes egin du: ontzat jo ditu PISAren datuak, baina erlatibizatzeko deia ere egin du.

Aurten irakurketa probaren emaitzak ez ematea adostu zuten Espainiako Gobernuak eta OCDEk, ikasle batzuek ez zutelako behar adinako zorroztasunez erantzun. Horrek adierazten du ikasleek ez dutela serio hartzen azterketa?

Niretzat ez da ezusteko handia izan, aurrez ere gertatu izan baita beste herrialde batzuetan: Herbehereetan, Erresuma Batuan, Ameriketako Estatu Batuetan... Dena den, orokorrean, PISAko emaitzak erlatibizatzearen aldekoa naiz ni: probak berak ematen digu ematen digun informazioa. Argazki bat ematen digu, eta interesgarria da, baina ez da argazki oso bat. Erantzukizunez jokatu beharko genuke, eta gizarteari adierazi emaitzak erlatibizatu behar ditugula. Izan ere, sentsazioa daukat komunikabideetatik arreta larregi eskaintzen zaiola PISAri, baina, nire ustez, interesgarriagoa litzateke arreta hori hezkuntza sisteman jartzea, horretaz eztabaidatzea, ekarpenak egitea eta eraikitzea.

Aurten 2015ekoaren kontrakoa gertatu da: EAEko emaitzak hobetu egin dira, eta Nafarroakoak, okertu. Txosten batetik besterako jauziak koiunturalak izan daitezke?

Hainbeste aldatu al dira gauzak hezkuntza sisteman? Esango nuke berdintsu jarraitzen dugula, eta, areago, PISAk emandako datuekin oso zaila dela esatea hobetu dugun ala atzerantz goazen. Irakurketa nahiko pasiboa egiten dut nik, alde horretatik. Batezbestekoan —irakurketako datuen faltan— hamalau puntu igo gara EAEn; ez dut uste horrek gauza handirik esaten digunik. Ez dut uste alarma pizteko arrazoirik dagoenik; begira ditzagun beste input batzuk. PISAk momentu jakin bateko argazki bat ematen digu, baina ebaluazioa askoz konplexuagoa da, erpin askoko eremua da: kontuan hartu behar dira sistema osoa, zentroak, ikasemaitzak... Eta hor hausnarketa sendoa egiten ari gara hezkuntza eragileon artean.

Zein dira beste input horiek?

Beste argazki batzuk baditugu inguruan; proba diagnostikoak, adibidez. Baina zentroz zentro egoera zein den ere aztertu behar da, tokian tokiko egoerari erreparatu; hau da, testuinguruaren irakurketa makrotik zein mikrotik egin behar da. Eta, bestalde, ikasleengan pentsatuta, zaindu egin beharko genuke nola irakurtzen eta kontatzen ditugun datuak: nire ustez, ikasleek harro egon beharko lukete atera diren emaitzekin, baina analisi batzuk oso negatiboak dira, eta horrek ere badauka eragina haien autoefikazian eta autoestimuan.

Iruditzen zaizu errazegi kritikatzen dela hezkuntza eremua?

Pena handiz irakurri ditut hainbat mezu. Sentsazioa daukat batzuetan irakurketa oso negatiboak egiten direla: 2015eko emaitzak jaitsi zirenez, egurra eman zen, eta, oraingoan, hobetu diren arren, egurra eman da. Baina zein da benetako hausnarketa? PISA une jakin baten argazkia baino ez dela, eta ez dituela neurtzen gure sisteman egiten diren gauza guztiak, ezta ikasleen konpetentzia guztiak ere. Interesgarria da halako argazkiak izatea, baina partzialak dira; ez diogu hainbesteko arreta jarri behar.

Dena den, datuen bilakaera historikoari begira, beheranzko joera bat ikus daiteke, batez ere, EAEn. Kezkagarria iruditzen zaizu?

Ez ditut sakon aztertu datu horiek, baina nire betaurrekoetatik beste datu batzuei ere erreparatzen diet: ekitatean oso ondo gaude EAEn, eta bikaintasunean ere ondo, baina badago hobetzeko aukera. Eta hor badago beste gai bat: ekitatea neurtzeko erabiltzen diren elementuetan antzeman daiteke ez dagoela alde handirik maila sozial baxua eta altua daukatenen artean; hori oso interesgarria da: zaindu eta elikatu beharreko datua da.

Nafarroan, berriz, oso puntuazio altuak lortu izan dituzte: 510etik gora arlo batzuetan. Hain ezberdinak al dira EAEko eta Nafarroako hezkuntza sistemak?

Nafarroan ere aritzen gara gu, eta antzeko egoera ikusten dugu; beraz, pentsatzen dut beste aldagai batzuk egongo direla. Halere, 500 puntutik behera izan arren, emaitzak onak dira: EAEn matematikan 499 puntu lortzea oso berri ona da.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Ertzaintzak egindako ikerketaren zenbait pasarteren irudiak. ©BERRIA

Ertzaintzak lurralde antolaketaren aurkako delitua ikusi du Zaldibarren

Iñaki Petxarroman

Durangoko epaitegiari helarazitako ikerketa baten arabera, zegokion baino lur eremu zabalagoa erabili zuen Verter Recycling SM enpresak, Jaurlaritzaren eta Zaldibarko Udalaren baimenik gabe
 ©MARISOL RAMIREZ / FOKU

«Osatu dugu minbizia? Oraindik ez, baina asko laguntzen ari gara»

Irati Urdalleta Lete

Aparteko kezka sortzen duen gaitza da minbizia, eta hori ikertzen aritzen da Zubiaga. Gaixoen biziraupena hobetuko bada, hiru norabidetan lan egiteko beharra ikusten du: diagnostiko goiztiarra, terapia zuzenduak eta txertoak.
AHTaren aurka 2010ean eginiko manifestazioa, Hendaia eta Irun arteko zubian. ©BOB EDME

Trenbidearen berritzea, abiadura lortzeko

Garazi Aduriz Zuñeda

Bordeleko, Baionako eta Irungo auzapezek trena berritzearen aldeko deia egin zutenetik, AHTaren eztabaida pil-pilean da Ipar Euskal Herrian. AHTaren aldekoak zein trenbidea berritzearen aldekoak beren argudioak mahai gainean jartzen ari dira proiekturik eraginkorrenaren bila.
Zaldibarko zabortegia amildu ostean bertan egin zituzten bilatze eta egonkortze lanen irudi bat. ©JAVIER ZORRILLA / EFE

Zabor azpiko 124 igerilekuak

Imanol Magro Eizmendi

Verter Recyclingek eskaturiko txosten baten arabera, amildu zenean 300.000 metro kubo ur zeuden zabortegiaren barruan. Egileen ustez, baina, ez zuen eraginik izan hondamendian.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.