Udal eta foru hauteskundeak. Bizkaia

EH Bilduk industrializazio prozesu bati ekitea proposatu du Barakaldon

Ezkerraldeko zenbait enpresa batzordetako ordezkariekin bildu dira. Ilardiak 50 milioi euroko diru poltsa sortu nahi du horretarako
Iker Casanova eta Bea Ilardia EH Bilduko kideak, atzo, Barakaldon.
Iker Casanova eta Bea Ilardia EH Bilduko kideak, atzo, Barakaldon. BERRIA Tamaina handiagoan ikusi

Gotzon Hermosilla -

2019ko maiatzak 21
EH Bilduko hautagaiek bilera egin dute Ezkerraldeko zenbait enpresa batzordeko ordezkariekin, Barakaldon (Bizkaia), BIC Bizkaia zentroan. Bileran, «proposamen zehatzak» aztertu dituzte, langileen ordezkariekin batera, Bizkaian —eta bereziki Ezkerraldean— «benetako industrializazio prozesu bat» abian jartzeko.

Batzarraren ostean, EH Bilduren Bizkaiko ahaldungai nagusi Bea Ilardiak eta Iker Casanova legebiltzarkideak azaldu dituzte bileraren nondik norakoak. Azaldu dutenez, Ezkerraldeko egoera aztertu dute langileen ordezkariekin, eta «irtenbideak» ere jarri dituzte mahai gainean.

Ilardiak gogora ekarri du arduradun politikoek «industria birmoldaketaz» hitz egiten zutela prozesuari ekin ziotenean, baina, EH Bilduren hautagaiaren arabera, ez zen horrelakorik egon: «Hona iritsi zen gauza bakarra desindustrializazioa izan zen».

Horren ondorioz, Ezkerraldeak gaur egun «Bizkaiko datu sozioekonomikorik txarrenak» ditu, eta zenbait herritan, Sestaon, esaterako, langabezia tasa %18 baino altuagoa da. «Hori onartezina da gaur egungo Bizkaian», esan du Ilardia hautagaiak.

Horri buruz egiteko, EH Bilduk zenbait neurri proposatu ditu. Horietatik garrantzitsuena da 50 milioi euroko diru poltsa sortzea, «zailtasunak dituzten enpresa industrialei laguntzeko». Horrez gain, industria lurzoruak «berreskuratzea eta berriztatzea» ere proposatu du ezkerreko indar subiranistak.

Ilardiak esan duenez, EH Bilduk «industria garatuaren aldeko apustu garbia» egiten du, industria arloko enpresek Bizkaitik alde egin ez dezaten eta herrialdea «erakargarri» izan dadin Bizkaitik kanpoko enpresentzat. «Hori da bidea kalitatezko enplegua sortzeko eta bizkaitar guztien ongizatea bermatuko duen ekonomia egonkor eta indartsua egituratzeko», adierazi du Ilardiak Barakaldoko hitzorduan.

Bilbon, txartel bakarra

Bilbon ere egin dute agerraldia EH Bilduren hautagaiek, eta garraiobideak eta mugikortasuna izan dituzte hizpide hiriburuan. Bilboko udal hautagai Bruno Zubizarretak txartel bakarra proposatu du, «garraiobide publikoak bultzatzeko».

Haren arabera, txartelak prezio bakarra izango luke ibilbide bakoitzerako, ibilbide hori egiteko erabilitako garraiobidea edozein delarik ere: trena, autobusa, tranbia...

Bilboko Abando eta Santimami arteko tartea jarri du Zubizarretak adibidetzat: bidaiaren balioa aldatu egiten da erabilitako garraiobidearen arabera. «Horren ondorioz, herritar askok ez dute garraiobidea aldatu nahi, horrek gehiago ordaintzea dakarrelako. Horrela, garraiobide publikoen erabilera murriztu egiten da», esan du EH Bilduren udal hautagaiak, txartel bakarra proposatzeaz batera.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna