EAJk tonua gogortu du EH Bilduren aurka, eta «kopia txarra» deitu dio

Inkesta gehienen arabera, EAJren eta EH Bilduren arteko lehia estua izango da Gipuzkoan igandeko udal eta foru hauteskundeetan. Horren jakitun daude jeltzaleak, eta garrantzia ematen ari dira Eider Mendoza Gipuzkoako ahaldungai nagusiaren eta Eneko Goia Donostiako alkategaiaren kanpainei, besteak beste. Horren erakusle bat da Iñigo Urkullu Eusko Jaurlaritzako lehendakaria behin baino gehiagotan izan dela Gipuzkoako ekitaldietan. Izan zen Eibarren, izan zen Tolosan eta, atzo, Donostiako Bulebarrean egindako ekitaldian izan zen, Mendozarekin, Goiarekin eta EAJren EBBko presidente Andoni Ortuzarrekin.

Lehia horren beste erakusle bat tonua da. Bulebarreko kioskoaren ondoan eserita zeuden dozenaka jarraitzaileri mintzatu zitzaizkien lau jeltzaleak, baina haien hitzaldietan EH Bilduri buruz jardun zuten bereziki. Tonua gogortu zuten hautagai jeltzaleek koalizio abertzalearen aurka. «Hauteskundeetan erabaki behar dugu kopia txarrarekin geratu edo aurrera egin. Bilduren zehaztasun falta edo EAJren bermea», esan zuen Mendozak txalo artean.

Gipuzkoako ahaldungai nagusiak EH Bilduko hautagaiei leporatu zien ez dutela «edukiez eztabaidatu nahi», eta koalizioarengandik bereizi nahi izan zuen: «Ez engainatu! Ez gara berdinak! Ez dugu proiektu bera gure herriarentzat! Gure irudia desitxuratzen dute, dena gaizki egin dugula esateko. Baina nork eraiki du herri hau? Nork defendatu ditu gure erakundeak eta eskubideak? Nork inbertitzen du osasunean inork baino gehiago?». Mitinaren esparruaren kanpoaldean 87 egun greban daramatzaten Osakidetzako garbitzaile azpikontratatuetako batzuk egon ziren protesta egiten, eta buruarekin eta eskuarekin ezezko keinua egin zuten Mendozaren galdera entzutean. Geroako Kaltetuak plataformako hainbat kide ere egon ziren Bulebarrean, euren dirua berreskuratu nahi dutela adierazteko.

Eusko Jaurlaritzako lehendakariak ere, hitza hartu zuenean, EH Bildu izan zuen hizpide. Haren ustez bi indarren artean dauden desberdintasunak nabarmendu zituen: «Pankarta baten atzean egotea, egunero dena gaizki egiten dela esatea, kontraboterearen bandera etengabe astintzea askoz ere errazagoa da. Hemen agindutakoa betetzen saiatzen dena eta ongizatea bermatzen duena EAJ da».

Urkullu botoa erabaki gabe duten horiei mintzatu zitzaien, eta «konfiantza berresteko» eskatu zien. Azaldu zuen botorik ez emateak EH Bilduri egiten diola mesede.

Antzeko mezua zabaldu nahi izan zuen Goiak: «EH Bilduk eta abstentzioak koalizioa osatzen dute». Koalizio abertzaleari «giroa gaiztotu» izana egotzi zion Donostiako alkategaiak, eta esan zuen «harro egoteko moduko hiria» dela Donostia; «[Espainiako] Estatu osoan errenta maila handiena eta langabezia apalena» dituena.

Ortuzar izan zen EH Bilduz gutxien hitz egin zuena; Donostiarako proposamenei buruz jardun zen bereziki. Hala ere, hitzaldiaren amaieran, bere kideen tonua hartu zuen: «EAJ ala Bildu. Obrak ala pankartak. Bai ala ez».