Sarek etorkizuneko erronkak finkatu ditu Donostian

DONOSTIA. Sare Herritarrak bost urte bete ditu, eta orain arteko ibilbidearen balorazioa egin zuen herenegun, politika, sindikalgintza, kultura eta beste hainbat eremutako herritarrekin batera, Miramonen. «Urrats bat aurrera» emateko garaia dela azpimarratu zuten bertan: «Sufrimendurik, biktima gehiagorik eta euskal preso eta iheslaririk gabe, elkarbizitza eta bakea oinarri dituen jendarte bat eraikitzearekin amesten dugu guk». Eta egoera hori errealitate bihurtzea da Sarek bere buruari jarri dion helburua: «Auzi hau, behin betiko konpondu behar dugu, gertatutako oro errepika ez dadin bermeak ezarri eta herri hau normalizazio egoera batera eraman. Ildo horretan, lanerako bi ardatz jorratuko dituzte: euskal presoei ezartzen zaizkien salbuespen neurrien amaiera bultzatzeko ekintzak, eta bizikidetza sustatzeko jarduerak.