Greba orokorra

Greba orokorra: herrietan ere manifestazioak egin dituzte arratsaldean

Arabak, Bizkaiak, Gipuzkoak eta Nafarroak beren gutxieneko soldata propioa izatea, eta 1.500 eurokoa izatea eskatuz, greba orokorra egiten ari dira gaur. Goizeko manifestazioetan 105.000 lagun bildu dira.

Bilboko manifestazioa gaur eguerdian. OSKAR MATXIN EDESA / FOKU

Peru Amorrortu, Joxerra Senar, Ion Orzaiz, Iñaut Matauko Rada, Imanol Magro Eizmendi, Ibai Maruri Bilbao, Irune Lasa, Igor Baigorri Perez, Kepa Ugarte Martiarena, Maddi Iturriotz Alkorta, Iker Aranburu

2026ko martxoaren 17a

06:00

Gaur greba orokorra egitera deituta daude Hego Euskal Herriko langileak. ELAk eta LABek bultzatu dute protesta, eta haiei batu zaizkie ESK, Steilas, EHNE-Etxalde eta Hiru sindikatuak ere. Ideia bakarra dago grebaren atzean, sindikalismoari erabat lotutakoa: Arabak, Bizkaiak, Gipuzkoak eta Nafarroak beren gutxieneko soldata propioa izatea, eta 1.500 eurokoa izatea. Manifestazio nagusiak 12:30ean hasita egin dituzte lau hiriburuetan.
Beren deialdi propioa egin dute CGT, CNT, Solidari sindikatuek eta Euskal Herriko Kontseilu Sozialistak. Gutxieneko soldata handiago batetik harago doazen aldarrikapenak egin dituzte, hala nola laneko prekaritatea, etxebizitza lortzeko ezintasuna, etxegabetzeak eta bazterketa soziala amaitzea.
Goizean goiz errepideak moztu dituzte grebalariek hainbat tokitan, eta grafikoa eten edo geldotu dute hiriburuen sarreretan, industria guneetan eta zenbait enpresa handiren sarreretan, besteak beste.
Hego Euskal Herriko lau hiriburuetan 105.000 pertsona batu dira manifestazioetara. ELA eta LAB sindikatuen arabera, greba orokorra «jarraipen zabala» izaten ari da. Nabarmendu dute industriako enpresa batzuetan ekoizpena «geldirik» dagoela, eta ohi baino trafiko gutxiago dagoela Hego Euskal Herriko lurraldeetan. Zerbitzu publikoetan ere grebaren jarraipena zabala izaten ari dela jakinarazi dute.
Garraio publikoan eta hezkuntzan ere agerikoa izaten ari da grebaren eragina.
Manifestazioen aurretik, piketeak egin dituzte hiriburuetako erdialdeetan eta merkataritza gune nagusietan. Bilbon, adibidez, ateak itxiarazi dizkiete Primarki eta El Corte Inglesi.
Eusko Jaurlaritzak esan du gutxieneko soldata propioaren alde dagoela, baina protestak modu baketsuan egiteko eskatu du: «Ez dugu uste bidea konfrontazioa denik, baizik eta elkarrizketa soziala».
EH Bilduk erran du «bizitza eta lan baldintza duinak aldarrikatzen dituztenen ondoan» jarraituko duela, eta Madrilek ezin duela Euskal Herriko gutxieneko soldata zein den erabaki. «Hori Gasteizek eta Iruñeak erabaki behar dute». Baina, horretarako, eskatu du eskaerari bizkarrik ez diezaiotela eman.
EAJk, berriz, salatu du greba orokorra «zarata ateratzeko» mekanismo bat bertzerik ez dela, eta EAEk eta Nafarroak ez dutela gutxieneko soldata igotzeko eskumenik.

azken momentuan

21:02

EH Bildu: «Ezkerreko subiranismoa oso harro dago»

Abertzaleek ez daukate zalantzarik: «Euskal Herrian posible da burujabetzatik, bai instituzioetatik eta baita kaleetatik ere, gure errealitate sozioekonomikora egokitutako gutxieneko soldata propioa lortzea. EH Bilduk, gaurtik aurrera ere, hori lortzeko ekimena hartu eta bideak irekitzen jarraituko du». Ontzat jo dute greba orokorra, bertzeak bertze, bizitzaren garestitzeari aurre egiteko «konpromiso argia eta ozena» erakutsi dutelako.