Albistea entzun

G7koen goi bilera Miarritzen

Gutxienez 19 lagun atzeman dituzte Baionan, protesta baten ondoren

Gutxienez 19 lagun atxilotu dituzte igandean. "Ostadarra" osatzekoak ziren G7 Ez eta Alternatives G7 plataformetako partaideak Angelu, Miarritze eta Baionako zazpi gunetan, baina bertan behera utzi dute deialdia, "baldintzarik" ez dagoelako. Bizi-k iragarri du mobilizazio astea eginen dutela irailaren 20tik 27ra.

Baionako Herriko Etxea, gaur arratsaldean.
Baionako Herriko Etxea, gaur arratsaldean. @BordeauxDeborde Tamaina handiagoan ikusi

Hodei Iruretagoiena -

2019ko abuztuak 26

Baionako erdigunea ixteko agindua eman zuen igandean ere Herriko Etxeak. Larunbatean, Polizia manifestariei oldartu zitzaien, eta istiluak eragin zituen. Frantziako Poliziak jakinarazi du denera 85 lagun atxilotu dituztela asteburuko protestetan, eta, atxilotu haien askatasuna eskatzeko, elkarretaratzera deitu zuten iganderako: 17:00etan, Baionako herriko etxearen aurrean. Ondorengo mezua zabaldu du Herriko Etxeak: "Manifestazio bat aurreikusita dagoela eta, baliteke segurtasun indarrek hiriaren erdigunera ematen duten zubiak ixtea. Autobusak Lessep kaitik bideratuko dira". Ondoren zehaztu dutenez, itxi egin dituzte Errobi gaineko zubiak eta Santa Ezpiritukoa. Manifestazioaren orduan, herriko etxearen inguru guztiak hartuak zituen Poliziak. Gutxienez 19 lagun atxilotu dituzte ondoren, merkatu inguruan, "erasorako erabil zitezkeen gailuak" zituztelakoan eta segurtasun indarrei "aurre egitea" egotzita. Goi bilera hasi zutenetik 104 dira dagoeneko atxilotutakoak.

17:00etarako, Frantziako Poliziak hartua zuen herriko etxearen aurrealdea, baina inguruko kaleetan bildu dira manifestariak. "Atxilotuak askatu" eta oihuak egin dituzte.


Baiona, gaur. BERRIA


Baiona, gaur. BERRIA

Euskal Herriko beste leku batzuetan ere antolatu dituzte protestak atxilotuen alde: Donostiako Bulebarrean, asteazkenerako, eta Irungo Mosku plazan, biharko, esaterako. Goizean, Hendaian manifestazioa egin dute ehunka lagunek.

Gaurko, ostadarra egiteko deia zabaldu zuten G7 Ez eta Alternatives G7 plataformek, baina bertan behera utzi dute azkenean. "Lekuz kanpoko polizia operazioa dela eta, plataformek baloratu dugu ezin dugula bernatu ekinaldian parte hartuko duen jendearen segurtasunerako gutxieneko baldintzarik". Arrazoi hori dela eta, G7 Ez plataformak bart jakinarazi du moldatu egingo zuela gaur zazpi plazetan egitekoa zuten mobilizaziorako deialdia. "Herri harresi gisako mobilizazio bat egingo dugu Euskal Herriak bizi duen setio egoera eta manifestatzeko eskubide urraketa salatzeko asmoz", adierazi zuten. Gaur Frantziako Attac-ek eta G7 Ez plataformak jakinarazi dute bertan behera utzi dutela deialdia.

Atzoko oharrean, G7 Ez plataformakoek azaldu zuten "ekintza kontsentsuaren baitan” hartu dutela erabakia. Miarritzen bilduak diren agintariei adierazi zieten mobilizatzen segituko dutela, "gure ideia, alternatiba eta borroken bidez". Berri agentziek zabaldu zutenez, Angeluko (Lapurdi) Amodio gelan ekitaldi bat egitekoa zuten.

Bizi mugimendu altermundialistak, berriz, gaur 10:00etatik aitzina Baiona Txikira joateko deia zabaldu du. Bertan, Emmanuel Macron Frantziako presidenteari urtean zehar ebatsi dizkioten argazkiak erakutsi dituzte. Baiona Txikian hasi dira paperez estalitako koadroak ateratzen. Agosti Xaho plazan bildu dira, eta, Pannecau karrika igarota, elizaren aurrean egin dute prentsaurrekoa. Ekintzaile ekologista ugari ziren. "Frantziar Estatuko segurtasun eremu handienean Macronen argazkiak ateratzea lortu dugu". Macronen politikak salatu dituzte ekintzaileek, eta, hitzetan klima trantsizioaren alde mintzo bada ere, ekintzetan kontrako politika duela salatu dute. Irailaren 20tik 27ra mobilizazio astea eginen dutela iragarri dute.

Atzo, 15.000 lagun bildu ziren Hendaia eta Irun artean egindako manifestazioan. Arratsaldean, istiluak izan ziren Baionan, Polizia manifestariei oldartu ondoren.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Euskal Hiriguneko biltzarra, joan den abenduan. ©GUILLAUME FAUVEAU

Euskal Elkargoa gainditu beharra

Ekhi Erremundegi Beloki

Euskal Hirigune Elkargoak bost urte beteko ditu igande honetan. Ipar Euskal Herriak izan duen lehen instituzio propioa eraikitze fasetik politika publikoak ontzera iragan zen 2020ko hauteskundeen ondotik, baina, anitzen ustez, bere mugak erakutsi ditu jadaneko.
Izadi haurraren alde joan den azaroan Burlatan egindako jaialdi bat. ©IDOIA ZABALETA / FOKU

Amarik gabeko urtebetetze eguna

Maddi Ane Txoperena Iribarren

Maria Lizarraga eta Iñigo Gutierrez euskal presoen alaba Izadik bihar beteko ditu 3 urte. Kartzelatik atera beharko du orduan, Espainiako espetxe legediak hala aginduta, eta amarengandik bereizi. Gutierrez atzo atera zen espetxetik, hirugarren graduan.
Aurreneko lerroan, ezkerretik, Gorka Urrutia, Beatriz Artolazabal eta Jose Ramon Intxaurbe, atzo. ©MARISOL RAMIREZ / FOKU

Espainiako segurtasun indarren lana balioesteko eskatu diote Jaurlaritzari

Gotzon Hermosilla

Txosten bat egin dute ETAk Guardia Zibilean eta Espainiako Polizian eragindako sufrimenduaz

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.