11/13 auzia

Gaur zortzi hasiko da 47 euskal herritarren aurkako epaiketa, Madrilen

Euskal presoen sostengu lanean aritzeagatik epaituko dituzte 11/13 makrosumarioko 47 auzipetuak Espainiako Auzitegi Nazionalean. Auzipetuei babesa adierazteko, manifestazioa egingo dute Bilbon, larunbatean.

11/13 sumarioa auzipetutakoen agerraldi bat, Donostian.
11/13 sumarioa auzipetutakoen agerraldi bat, Donostian. Gorka Rubio / Foku

Maider Galardi F. Agirre -

2019ko irailak 9

Astelehenean hasiko da 11/13 auzikoen aurkako epaiketa, Madrilen, Espainiako Auzitegi Nazionalean. 2013 eta 2015 bitarte 47 lagun atxilotu zituzten euskal presoen babes taldeetan aritzeagatik. Besteak beste, abokatuak, medikuak, psikologoak, bitartekariak eta Etxerat eta Herrira-ko kideak dira auzipetuak, eta fiskalak 601 urteko espetxe zigorra eskatu du, guztira (ikusi BERRIAren webgune berezia). "Erakunde terroristako kide" izatea leporatzen diete auzipetu guztiei, eta ETA finantzatzea horietako askori. 2012ko egitateei dagozkie egozten dizkieten delitu horiek guztiak.

Lehen atxiloketak izan eta sei urtera abiatuko da epaiketa. Akordiorik ezean —joan den larunbatean Bilbon egindako agerraldi batean esan zuten auzipetuek ez zutela baztertzen akordio bat egitea, baina defentsa prestatzea zela lehentasuna—, hiru hilabete iraungo du epaiketak, eta auzipetuek salatu dute 350.000 euroko gastua izango dutela bitarte horretan. Zigorra ezartzen badiete, espetxealdiari ez ezik, isun ekonomikoei ere egin beharko diete aurre.

47ei babesa adierazteko hainbat egitasmo egin dituzte udan, eta, auzipetuen arabera, jasotako babesa "olatu bat" izan da. Besteak beste, auzipetuen aldeko manifestuak 11.000 sinadura jaso ditu. Larunbatean, berriz, Bilbon egingo dute manifestazioa, 17:30ean Casillatik abiatuta.

Eskaerak eta defentsa

Iker Urbina abokatuak BERRIAri adierazi dion moduan, defentsa bateratua prestatu dute auzipetuek eta abokatu talde batek, auziaren "enbor" nagusietako bat delako ETAko kide izatea leporatzen dietela 47ei. Edonola ere, kasuaren araberako zigorrak eskatu ditu fiskalak, eta, makrosumarioaren barruan, diferentea izango da Herrira-ko kideen, bitartekarien, abokatuen, Jaki Hadi-ko kideen eta Etxerat-ekoen kontrako prozesua. Auzipetu bakoitzaren ezaugarriak azaltzeko, eta makrosumarioaren atalen inguruko informazioa emateko, BERRIAk webgune berezi bat jarri du.

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
S: