EAren primarioak

EAko hauteskunde batzordeak atzera bota du Maiorga Ramirezen hautagaitza

Ramirezek salatu du "Eva Blanco beste hautagaiaren aldeko kideez soilik osatutako batzordeak" baliogabetu egin duela bere hautagaitza, nahiz eta baldintzak bete. EAk prentsa oharrean azaldu du Ramirezek ez dituela baldintzak bete

Maiorga Ramirez, joan den ostiralean, abalak aurkeztu zituenean.
Maiorga Ramirez, joan den ostiralean, abalak aurkeztu zituenean. IÑIGO URIZ / FOKU

Joxerra Senar -

2019ko urriak 14

Eusko Alkartasuna barruan tentsioa handitzera doala dirudi. Urriaren 25ean egitekoa zen hauteskunde primarioetarako hiru hautagai aurkeztu ziren iragan astean: Eva Blanco, Maiorga Ramirez eta Juan Luis Cristobal Zendoia. Bai Ramirezen bai Cristobal Zendoiaren hautagaitzak baliogabetu ditu EAko hauteskunde antolaketa batzordeak, baldintzak ez dituztela betetzen argudituta.

Batzorde horren arabera, Ramirezek ez du  herrialde bakoitzeko gutxienez bost abal lortzeko baldintza bete, eta, gainera, aurkeztutako 400 abaletatik 21 irregularrak dira (ez dute nortasun agiririk, kuotak ordaindu gabe dituzte, ez dira EAko erroldan ageri, bikoiztuta daude, ez dute hautagaitza bermatzen edo epez kanpo aurkeztu dira). Orain arte ez da jakinarazi beste hautagai bat zegoela, baina Cristobal Zendoiak ez du abalik aurkeztu, eta, hortaz, ezin zen hautagai gisa aurkeztu.

Maiorga Ramirezek ozen protesta egin du erabaki horren aurka. 20:00etan bidalitako oharrean, irmo salatu du batzordeak "jauntxokeriaz" jokatu duela, eta iragarri du berehala helegitea aurkeztuko duela EAko berme batzordearen aurrean eta hauteskunde batzordean bertan. Ramirezen arabera, hautagai izateko baldintzak bete ditu, herrialde bakoitzeko bost berme baino gehiago aurkeztu dituelako. Zalantzak zeuden ea Iparraldean baldintza hori beteko ote zuen, baina, Ramirezen arabera, zazpi aurkeztu ditu. EAk ez du zehaztu irregulartzat jotako abalen artean zazpi horietako batzuk dauden.

Ramirezen arabera, "benetako eskandalu bat" da gertatutakoa, eta EAko afiliazioari primarioetan parte hartzeko eskubidea ukatu egin nahi zaio, "automatikoki Eva Blanco idazkari nagusi izendatzeko". Ramirezen arabera, "aurrekaririk gabeko gehiegikeria da". Gogorarazi du berak Blancok baino sei aldiz abal gehiago aurkeztu dituela —Blancok 60 abal aurkeztu ditu—. Jakinarazi du uneotan Blancori "erabat irregularra" den egoera kudeatzea egokituko zaiola.

Hain zuzen ere, Blancok azken egunotan eman dituen hainbat elkarrizketatan alderdi barruko tentsioa baretu eta ados jartzeko beharra azpimarratu du.

Arau aldaketak eta polemika

Hautagai izateko arauekin izan da zalaparta handia azken asteotan. Izan ere, ekainean onartutako araudiak herrialde bakoitzeko bost abal gutxienez lortzeko helburua jarri zuen.  Alderdiak Ipar Euskal Herrian hogeiren bat afiliatu dituenez, baldintza hori betetzeko zailtasunak izan zitzakeen Ramirezek. Bertako erroldara jotzeko arazoak izan dituela salatu zuen aurreko egunetan.

Iragan astean EAko berme batzordeak herrialdeka bost abal lortzeko baldintza kendu zuen, baina asteazkenean ezohiko Nazio Batzarrera deitu zuten, eta batzar horretan araudia bere horretan utzi zuten osorik, aldeko 55 botorekin eta kontrako 39rekin.  Ostegunean, batzarrak ebazpen bat onartu zuen, azpimarratuz biltzar batetik besterako garaietan alderdiaren organo gorena dela eta hari dagokiola araudiak onartzea. Hala ere, alderdiko 39 kidek agiri bat izenpetu zuten argudiatuz Batzar Nazionala derrigortuta zegoela berme batzordearen araudi aldaketa errespetatzera. Horrek guztiak agerian uzten du azken egunetan izan den tentsio giroa.

Ramirezek aurkeztuko duen helegiteen emaitzaren zain, Eva Blanco da EAko idazkari nagusi izateko hautagai bakarra.

 

 

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Nekane Murga, atzo, Eusko Jaurlaritzaren Bilboko egoitzan. ©Miguel Toña / Efe

Eusko Jaurlaritzak osasun larrialdia ezartzeko asmoa du

Andoni Imaz

Urkullu jarduneko lehendakaria litzateke batzorde bereziaren burua berriro ere, eta aukera izango luke jendea bakartzeko eta joan-etorriak mugatzeko. Murgak eta Tapiak agerraldi bat egingo dute bihar, hartuko dituzten neurriak esplikatzeko.

Salvador Illa Espainiako Osasun ministroa gaurko agerraldian. ©Chema Moya/EFE

Diskotekak eta gaueko tabernak ixteko agindu du Madrilek

Berria

Neurriak zorroztuko dituzte Hego Euskal Herrian, egoera epidemiologikoak okerrera egin duela eta. Gainerako taberna edo jatetxeek 01:00ean itxi beharko dute, eta gauerditik aurrera ezingo da bezero gehiagorik sartu. Kalean erretzea ere debekatuta egongo da, bi metroko tartea bermatu ezin bada.

Jendea paseoan Donostiako alde zaharreko kaleetan, atzo. ©Juan Carlos Ruiz/FOKU

618 kasu atzeman dituzte Hego Euskal Herrian

Berria

Bizkaian behera egin dute kasuek; Araban, Gipuzkoan eta Nafarroan, aldiz, igo egin dira.

Osasun langileak PCR probak egiten Donostian, aurreko astean. ©Gorka Rubio/FOKU

Azpeitiko Erdikalean ibili zirenei proba egiteko eskatu die Jaurlaritzak

Berria

Abuztuaren 7tik 9ra bitartean kale horretan ibilitakoek egin beharko dute testa.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna