Bertsolaritza

Aramaion egingo da Bertso Eguna, urtarrilaren 18an

Bertso ibilbide gidatua egingo dute eguerdian, eta lau bertso bazkari jarraian. Besteak beste, Irati Majuelok, Jokin Urangak, Sustrai Colinak, OIhana Iguaranek, Andoni Egañak, Ane Labakak, Miren Artetxek eta Unai Iturriagak hartuko dute parte.

Iaz Barañainen egin zen Bertso Eguna
Iaz Barañainen egin zen Bertso Eguna Jagoba Manterola / Foku

Berria -

2019ko abenduak 17

Mungian (Bizkaia) egin zen Bertso Eguna 2018an; Barañainen (Nafarroa) iaz, eta Aramaion (Araba) izango da hurrengoa, urtarrilaren 18an. Donostia izan zen, urte luzez, Bertso Egunaren plaza, baina, Bertsozale Elkarteak ekitaldiaren beraren dinamika aldatu eta «ibiltaria» izatea erabaki zuenetik, Gipuzkoan ez dauden Euskal Herriko herrietan antolatu dute bertsolarien festa egun handia izaten dena.

Aurtengo Bertso Egunean, eguerdi eta arratsaldeko lehen orduetan izango dira saio nagusiak. 12:30ean hasita, bertso ibilbide gidatua egingo dute, herriko erdigunean, Xabi Igoa, Irati Majuelo, Jokin Uranga, OIhana Bartra, Sustrai Colina, Martin Abarrategi, OIhana Iguaran, Andoni Egaña eta Ane Zuazubiskarrek.

Jarraian lau bertso bazkari izango dira beste horrenbeste elkartetan. Uribarriko elkartean, Onintza Enbeita eta Sebastian Lizaso ariko dira; Zabolako elkartean, Iñaki Viñaspre eta Ane Labaka; Izarra elkartean, Eneko Lazkoz eta Miren Artetxe; eta Ehiztari txokoan, Nerea Elustondo eta Unai Iturriaga.

Bazkarietarako sarrerak gaur bertan jarri dituzte salgai,  www.bertsosarrerak.eus atarian.

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna