Noiz sortua: 2020-05-31 08:02:41

Erkidegoek kudeatuko dute hirugarren fasea

Alarma egoera luzatzeko akordioa egin dute Espainiako Gobernuak eta EAJk, eta, horren truke, Urkulluk eta Txibitek hartu, kendu, moldatu eta ezarriko dituzte alarma egoeratik ateratzeko neurriak hirugarren fasean Hego Euskal Herrian. ERCrekin ere egin du hitzarmena Madrilek. Ekainaren 8an hirugarren fasean sartzea eskatuko du Jaurlaritzak bihar.

Aitor Esteban eta Salvador Illa, Kongresuan. /
Aitor Esteban eta Salvador Illa, Kongresuan. / Ballesteros/EFE Tamaina handiagoan ikusi

Jon Ordoñez Garmendia -

2020ko maiatzak 31

Hirugarren fasetik aurrera, autonomia erkidegoetako presidenteek kudeatuko dituzte alarma egoeratik ateratzeko neurriak Hego Euskal Herrian, erkidegotik ateratzeko baimenari dagozkionak izan ezik. Iñigo Urkulluk eta Maria Txibitek zehaztuko dituzte, beraz, hirugarren fasean hartu beharreko neurriak. Erkidegoetako presidenteek Pedro Sanchezekin egin ohi duten bileran Iñigo Urkulluk gaur iragarri duenez, Eusko Jaurlaritzak bihar bertan eskatuko du ekainaren 8an hirugarren fasera igarotzea. Urkulluk argudiatu du autonomia erkidegoa bide onean dela, eta positiboa izan dela bigarren fasea. Hirugarren fasera igarotzea ez ezik, alarma egoera mantendu behar den aztertzeko ere eskatuko du. Pedro Sanchezek asteazkenean hamabost egunez luzatzea eskatuko du Kongresuan, eta EAJk babestu egingo du luzapen hori, atzo adostu zuten moduan.

Espainiako Gobernuaren eta EAJren arteko akordioaren arabera, autonomia erkidegoek proposatuko diote Espainiako Osasun Ministerioari zeintzuk izango diren erkidego bakoitzeko lurralde unitateak "normaltasun berrian". Beraz, atzo Madrilek zehaztu arren hirugarren fasean ezingo dela probintziatik atera, hori alda liteke, eta posible da ekainaren 8tik aurrera Araba, Bizkaia eta Gipuzkoa artean mugarik gabe ibili ahal izatea. Seigarren luzapena izango da, ekainaren 21era arte.

"Kontrola berreskuratzea"

Hala adostu dute Madrilek eta jeltzaleek alarma egoera berriro luzatzeko egin duten akordioan. Seigarren luzapena izango da, eta ekainaren 21era arte luzatuko litzateke, onartuz gero, alarma egoera. Asteazkenean, Pedro Sanchez presidenteak Espainiako Kongresura eramango du luzatze hori, eta EAJk babesa emango dio. Akordioa Carmen Calvo Espainiako presidenteordeak, Andoni Ortuzar EAJko presidenteak, Aitor Esteban EAJko Kongresuko bozeramaileak, Josu Erkoreka Eusko Jaurlaritzako bozeramaileak eta Jose Antonio Montilla Marcos Espainiako Gorteekiko Harremanetarako estatu idazkariak izenpetu dute, eta atzo gauean ezagutarazi zuten.

Estebanek Euskadi Irratian esan du akordio horri esker EAEk eta Nafarroak "eskumen osoa" edukiko dutela alarma egoera kudeatzeko. Gaineratu du Hego Euskal Herrian hartuko diren erabakiak Madrilen hartzen direnen gainetik egongo direla, eta modu horretan lurraldearen "kontrola berreskuratu" egingo dela hirugarren fasean.

Akordioak zazpigarren artikuluan dio alarma egoeraren luzapen horretan Espainiako Osasun ministroak eta erkidego bakoitzeko presidenteak kudeatuko dutela alarma egoera. Hirugarren fasetik aurrera, berriz, erkidego bakoitzeko presidentea izango da neurriak hartu, kendu, moldatu eta ezarriko dituena. Salbuespen bat bada: erkidegotik ateratzeko askatasunari eragiten dioten neurriak. Egun, bigarren fasean da Hego Euskal Herria, eta litekeena da, okerrik ezean, ekainaren 8an igarotzea hirugarrengora.

Lurralde unitateak proposatzeko gaitasuna

Hirugarren fasean, akordioan jasotzen denez, Urkulluk eta Txibitek Salvador Illa Osasun ministroari proposatu ahal izango diote zeintzuk izango diren lurralde unitateak "normaltasun berrian" sartzeko. Alegia, Araba, Bizkaia, Gipuzkoa eta Nafarroa izan beharrean, beste batzuk izatea proposatzeko gaitasuna izango dute. Eusko Jaurlaritzak hirugarren fase horretan Araba, Bizkaia eta Gipuzkoa bat izatea nahi du, eta, lurralde unitatea erkidegoa izanez gero, hiru herrialde horien artean libre ibili ahal izango da.

Espainiako Gobernua atzo hasi zen zehazten nolakoa izango den hirugarren fasea, bihartik Kanariar Uharteetan fase horretan sartuko direla eta. Hor zehaztu du probintzia izatea lurralde unitatea, baina orain Urkulluk eta Txibitek bestelako unitate geografikoak proposatu ahal izango dizkiote. Gainera, Madrilek atzo aldizkari ofizialean argitaratu zuenez, eguneko udalekuak baimenduta daude hirugarren fasean, eta 70 urtetik gorakoentzako ordutegiak desagertu egingo dira. Gehienez hogei pertsona elkartu ahal izango dira. Taberna eta jatetxeek edukieraren erdia izango dute, eta terrazetan edukiera %70era handituko da. Gainera, taberna barruko barran kontsumitu ahal izango da, baina bezeroen edo bezero multzoen artean bi metroko segurtasun distantziari eutsita.

Akordioa ERCrekin ere

Pedro Sanchezen gobernuak akordioa egin du ERCrekin ere alarma egoera luzatzeko. Katalanak abstenitu egingo dira, eta, horren truke, autonomia erkidegoek parte hartuko dute pandemiari aurre egiteko Europako diru laguntzen kudeaketan. Alarma egoeraren luzatze hau azkena izatea ere adostu dute.

Aurreko luzapena onartu zutenean, Sanchezek hilabete batekoa nahi izan zuen, baina, Ciudadanosen babesa izateko, erdira murriztu zuen. ERCk kontra bozkatu zuen, Madrilek Ciudadanosekin egin nahi zuelako akordioa, eta ez haiekin. Orduko horretan EH Bilduren abstentzioa ere adostu zuen, 2012ko PPren lan erreforma bertan behera uzteko.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

ENDIKA PORTILLO / FOKU ©Lehen arretako profesionalen protesta bat, iaz, Gasteizen.

Hildako bat eta 15 kutsatu gehiago izan dira, datu ofizialen arabera

Ane Eslava

Egoera «kontrolpean» dagoen arren, «zuhurtzia» eskatu du Nekane Murga Jaurlaritzaren Osasun sailburuak. Nafarroan ez da kasu berririk egon. Lehen arretako langileek protesta egin dute Bilbon.

Larrialdi zerbitzuek behin-behineko ospitale bat jarri dute Lleidan. ©Ramon Gabriel / Efe

Kataluniako Gobernuak konfinamendua ezarri die 200.000 herritarri

Berria

Lleidako eskualde batean koronabirusaren zortzi agerraldi detektatu dituzte. Eguerdian jarri dute indarrean.

Osasun langileak lanean, Gurutzetako ospitalean. ©MARISOL RAMIREZ / FOKU

Auzitegi Nagusiak dio Osakidetzak ez zuela babes baliabide nahikoa

Ainhoa Larretxea Agirre - Irati Urdalleta Lete

Osakidetzak «ontzat» jo du ebazpena, «ez dituelako aintzat hartu sindikatuen eskaera gehienak». ESK sindikatuak jarri zuen salaketa, eta ekainaren 16an egin zuten epaiketa

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna