Kotte Ezenarrok Hendaye Avec Vous listarekin irabazi zuen udal bozen lehen itzulia, martxoaren 15ean. 2014tik auzapeza da, eta bozen %41,1 lortu zituen duela bi hilabete eta erdi. Pascal Destruhaut izan zen bigarren, bozen %32,7rekin. Laetitia Navarron abertzaleak bozen %18,4 lortu zituen, eta Laurent Tariol komunistak, berriz, %7,8.
Larunbat gauean, Navarron zerrendaburu zuen Hendaia Biltzen hautagaitza abertzaleak deliberatu zuen Ezenarroren taldearekin eginiko aurreakordioa onartzea. Hori horrela, bi hautagai baino ez dira igaroko ekainaren 28an egitekoak diren bigarren itzulira: Ezenarro eta Destruhaut.
Lehen itzuliaren ostean, hemezortzi udalerritan egin beharko dituzte bozak Ipar Euskal Herrian, auzapeza aukeratzeko. Posizioak mugituz doaz bigarren itzuli horri begira; atzo, Baiona Berde eta Elkarkideak jakinarazi zuen ez dela Henri Etxetorekin batuko.
