Itxaronaldiaren ondoren iritsi da espero zena: garaipena lortu du Joe Biden Alderdi Demokrataren presidentegaiak. Itxaronaldi luze samarra izan da askorentzat, bai AEBetako herritarrentzat baita zenbait atzerritarrentzat ere: besteak beste, AEBetan bizi diren hainbat euskaldunentzat. Eneko Axperen, Eli Etxetxikiaren eta Juan Garziaren kasua da hori: jakin-minez eta urduritasunez kasu egin diote kanpainari. Eta behin kanpaina igarota eta ziurgabetasun nagusiak gaindituta, AEBetako presidentetzarako hauteskundeen nondik norakoak xehatu dituzte BERRIAn.
«Tentsio handiko kanpaina izan da, eta tentsio handiko momentuak bizi izan dira», adierazi du Axpe fisikariak. San Frantziskotik (Kalifornia) aztertu ditu hauteskundeak, eta AEBak inoiz baino zatituago ikusten dituela aitortu du. Etxetxikiak eta Garziak Renotik (Nevada) kasu egin diete egun korapilatsuotako gorabeherei, hain zuzen, azkenean erabakigarria izan den estatu batetik. Kanpainako eta hauteskundeetako bitxikeriak eta gakoak zein izan diren azaldu dute, eta Trump presidenteak iruzurraren mamua zabaldu izana ere aztertu dute. Hiruren iritziz, adierazpen pozoitsuak izan dira Trump presidenteak eginikoak, eta litekeena da bere zaleengan ere eragin izana. Orain, presidentetza Bidenena dela argituta, egoera gaiztotuko den beldur dira.
