Hong Kongeko Gobernuak «demokraziaren» aldeko mugimenduko beste hiru kide zigortu ditu gaur: Joshua Wong oposizioko ekintzaile eta mugimenduko kiderik ezagunena eta Agnes Chow eta Ivan Lam kideak. Wong hamahiru hilabeteko espetxealdira zigortu dute, eta hamarna hilabeteko zigorra ezarri diete Chomi eta Lami. Hirurei leporatu diete 2019ko ekainean gobernuaren kontrako legez kanpoko manifestazio bat antolatzea eta mobilizazio horretan parte hartzea.
Garai horretan, protesta jendetsuak izan ziren Hong Kongen, Txinarako estradizioei bide ematen zien legearen aurka. Manifestarien presioak hiriko gobernua behartu zuen legea behin-behinean etetera.
Epaitu dituzten gertaerak Txinak Hong Kongerako onartu zuen Segurtasun Legearen aurrekoak direnez, zigor gogorragoak saihestu dituzte. Izan ere, bizi guztiko kartzela zigorra aurreikusten du lege horrek segurtasun nazionalaren kontrako delituentzat.
#JoshuaWong 13.5m in jail - via lawyers, “it’s not the end of the fight. Ahead of us is another challenging battleground. We’re now joining the battle in prison along with many brave protestors, less visible yet essential in the fight for democracy and freedom for HK. pic.twitter.com/1ZGmfUDf7k
— Joshua Wong é»Âƒä¹Â‹é‹ÂÂ’ 😷 (@joshuawongcf) December 2, 2020
Wongek Twitter bidez adierazi du aldarrikapen politikoei eutsiko diela kartzelatik. «Ez da borrokaren amaiera. Gure aurretik beste gudu zelai bat dugu erronka. Orain, espetxeko gudura batuko gara beste manifestari ausart batzuekin batera. Ez da hain agerikoa, baina bai ezinbestekoa Hong Kongerako demokrazia eta askatasuna lortzeko borrokan».
Wongek hurrengo hauteskundeetan parte hartuko zuela iragarri zuen abuztuan. Bozak irailean egitekoak ziren, baina urtebete atzeratu zituen hiriko gobernuak pandemia kontrolatu beharra zegoela argudiatuta.
Espetxeratutako hiru ekintzaileak ezagun egin ziren 2014ko Aterkien Iraultzan.
