Espainiako Espetxe Erakundeen ortziraleroko iragarpenen artean, Beatriz Etxeberriarena eta Iñigo Zapirainena daude gaur: Iratiren gurasoak dira bi euskal presoak, eta joan den martxoaren 8tik alabarengandik urrunduta daude, 3 urte bete baitzituen egun horretan Irati haurrak. Iragarpenaren arabera, El Duesora eramanen dituzte (Kantabria, Espainia, 170 kilometro).
Horiek ez ezik, bertze hiru euskal preso ere hurbildu eta bat Euskal Herriratuko dutela iragarri dute. Jurdan Martitegi da Euskal Herriratuko dutena: Soto del Realen dago gaur egun (Madril, 430), eta Martutenera ekarriko dute (Donostia). Hurbilduko dituztenak Asier Badiola, Jon Troitiño eta Harriet Iragi dira: Badiola Valentziatik (600 kilometro) El Duesora mugituko dute; Jon Troitiño, Murtzia IItik (820 kilometro) Logroñora (170 kilometro); eta Iragi ere, Logroñora, Castello IItik (480 kilometro).
Espetxe Erakundeek jakinarazi dutenez, bertzalde, joan den astean iragarritako Asier Karrera Arenzanaren Euskal Herriratzea ez da Zaballara izanen (Araba), Martutenera baizik.
