Azken sei asteetako kasu gehien atzeman dira Hego Euskal Herrian: 811 COVID-19 kasu zenbatu dituzte atzoko probetan. Zehazki, otsailaren 10etik erregistratu den daturik makurrena da hori. Positiboen portzentajeak ere gora egin du: %6,5 da Hegoaldean. Gainera, Nafarroako datua nabarmen okerragoa da: testen %8,6k eman dute positibo. OME Osasunaren Mundu Erakundeak %5ean du ezarria izurritea kontrolpean edukitzeko gehienezko muga.
Lurraldez lurralde, Bizkaian atzeman dira positibo gehien: 293. Nafarroa du atzetik; izan ere, 207 kasu zenbatu ditu Osasunbideak. Halaber, Gipuzkoan 199 kasu izan dira, eta Araban, 104.
