Albistea entzun

madrilgo hauteskundeak

«Taktizismoak» uzteko eskatu dio EAJk PSOEri

Jeltzaleek uste dute Madrilgo hauteskundeen emaitzek eragin eskasa izango dutela Espainiako gobernabidean, eta, izatekotan, Sanchezen gobernuak amaierara arte luzatu nahiko duela legealdia.

Pedro Sanchez eta Aitor Esteban hizketan Espainako Kongresuan, iazko abenduan.
Pedro Sanchez eta Aitor Esteban hizketan Espainako Kongresuan, iazko abenduan. Mariscal / EFE Tamaina handiagoan ikusi

Jon O. Urain -

2021eko maiatzak 5

Igaro dira Madrilgo erkidegoko hauteskundeak, eta garaipen handia lortu dute PPk eta Isabel Diaz Ayuso Madrilgo orain arteko presidenteak. Baina porrotak ere utzi zituen atzoko gauak: PSOEk hamar puntu galdu zituen; ezkerrak oro har PPk bakarrik baino boto gutxiago lortu zituen; eta Ciudadanosek ordezkaritza guztia galdu zuen, gutxieneko %5era iritsi ezinda.

Hortaz, orain ikusteko dago Madrilgo emaitzek zer ondorio izango duten Espainiako politikagintzan. EAJko iturrien iritziz, eragin eskasa izango du atzokoak Espainiako gobernabidean, iritzita PPk ez duela gaitasunik Espainiako Kongresuko gehiengoak aldatzeko. «Are gutxiago Ayuso estiloan oinarrituta egin nahi badu, Voxen populismoari jarraituta». Izatekotan, ordea, Sabin Etxean uste dute atzokoak eragin lezakeela PSOEk eta Unidas Podemosek legealdia amaieraraino luzatu nahi izatea.

Horregatik, «taktizismoak» alde batera uzteko eskatu diote PSOEri: «Gai praktikoetan lanean hasi behar du. Ez dago aitzakiarik. Garaia da politika, letra larriz, estatura itzultzeko». Eta ohartarazi diote estatuan «egonkortasuna eta sendotasuna» nahi duenak «seriotasunez hitz egin eta adostu» beharko dutela euskal herritarrekin eta katalanekin.

Iturri jeltzaleek gogoeta egin dute Podemosek eta Ciudadanosek lortutako emaitzen inguruan ere: «Politika berria ziren, gauzak egiteko beste modu bat ekartzera zetozen... Agian data honek ziklo baten amaiera esan nahi du». C's-i begira, EAJn aurreikusten dute koadro asko alderditik joango direla, eta, beraz, jeltzaleen kezka ez da alderdiaren zuzendaritzan zein geratzen den, baizik eta alderdi hori osatzen dutenek zer norabide hartuko duten.

Edozein gisara, Iñigo Urkullu Eusko Jaurlaritzako lehendakariak Diaz Ayuso zoriondu du atzoko garaipenaren ondoren, eta gonbita egin dio «beharrezko harreman instituzionala» izatera. Espainiako Gobernuaren estrategia aldaketarik espero duen galdetuta, Urkulluk esan du Jaurlaritzak Sanchezen gobernuaren aldetik daukan konpromisoa Gernikako Estatutua betetzea dela: «Horretan aritu gara orain arte, eta horretan jarraituko dugu».

Alternatibarik ez

Antzerako iritzia azaldu du Roberto Uriarte Unidas Podemoseko diputatuak ere Radio Euskadin, uste baitu ez dagoela «alternatibarik» Espainiako Gobernuak Kongresuan daukan babesarekiko. Uriarteren iritziz, PSOEk eta Unidas Podemosek osatutako gobernuak badu «indarra» legealdia amaitzeko, eta, Madrilen eskuina «oso indartsu» egon arren, ez du uste horrek «beste lurralde batzuekin konektatzen» duenik: «Ia ez du presentziarik nazio historiko ugaritan, eta presentzia desorekatua dauka estatuaren barruan».

Uriartek txalotu egin du Pablo Iglesiasek politikagintza uzteko modua, eta uste du hura ordezkatzeak modua emango duela Unidas Podemosen espazio politikoa indartzeko: «Unidas Podemosen espazio egonkortu bat dago, ez dena sarreran izan zena bezain garrantzitsua, baina, hura gabe, gaur egun Espainian ez dago gobernabiderik». Horregatik, erantsi du «Espainiaren gobernabiderako eta estatu plurinazional baterako edozein proiektuk» beharrezko duela «Unidas Podemosen espazio sendo bat, hura baita gaur egun existitzen den zubi bakarra».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©EH BILDU

EH Bilduk estatutuaren «agortzea» nabarmendu du; PSE-EEk, ekarpenak

Maddi Ane Txoperena Iribarren

Urkulluk azaldu du «bete gabe» dagoela eta 30 eskumen lekualdatzeke daudela oraindik ere. PPk estatutuaren «deuseztatze» nahia salatu du

Urkullu, gaur, herritarren galderak erantzuten. ©Irekia

Urkulluk esan du «bateragarriak» direla pentsio minimoa hobetzea eta AHTa egitea

Edu Lartzanguren

Herritarrek eginiko hogei galderari erantzun dio Iñigo Urkullu lehendakariak, '#UrkulluTopaketa' egitasmoaren barruan.

ETArena izan zitekeen aspaldiko zulo bat aurkitu dute Ataunen

ETArena izan zitekeen aspaldiko zulo bat aurkitu dute Ataunen

Berria

Herritar batek aurkitu zuen Aitzarte edo Ataungo Domoan.

Maddalen Iriarte, gaur, Gasteizen egindako ekitaldian. ©EH BILDU

PSE-EEk Gernikako Estatutuaren ekarpenak nabarmendu ditu; EH Bilduk, gabeziak

Maddi Ane Txoperena Iribarren

Estatutuaren 42. urteurrenean, PSE-EEk autogobernuarekiko «konpromiso jarraitua, zintzoa eta arrakalarik gabea» berretsi du, eta nabarmendu du estatutu berri bat egitekotan «memorian oinarritua» beharko lukeela. EH Bilduk uste du estatutua ez dela «gai Euskal Herriaren eta herritarren beharrei» erantzuteko.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.