Albistea entzun

Energia

Alemaniak gasa errazionatzeko beste urrats bat egin du

Errusiak %60 gutxitu du gas isuria Nord Stream 1 gasbidean, eta uztailean dena etengo duen beldur da. Bigarren mailako alerta izendatu du, eta hirugarrenarekin iritsiko dira errazionamenduak.

Robert Habeck Alemaniako Ekonomia ministroa, gas erreserbak erakusten dituen grafko batekin.
Robert Habeck Alemaniako Ekonomia ministroa, gas erreserbak erakusten dituen grafko batekin. Clemens Bilan / Efe Tamaina handiagoan ikusi

Iker Aranburu -

2022ko ekainak 23 16:48

Gasa faltako zaion egunerako prestatzen jarraitzen du Alemaniak. Martxoaz geroztik lehen mailako alertan egon ondoren, gaur bigarren mailara igo du alerta hori, Errusiatik iristen zaion gasaren fluxua gutxitzen ari zaiolako. Hirugarren eta azkenarekin, Berlingo gobernuak eskubidea izango du gasa errazionatzeko: herritarrek eta ospitaleek, esaterako, jasoko lukete, baina industriak mozketak izango lituzke. Halako erabaki batek atzeraldia ekarriko lukeela uste dute ekonomista gehienek.

Gasa erruz erabiltzen du Alemaniak: bere argindar ekoizpenaren %15 lortu izan du ziklo konbinatuko zentralen bidez, etxebizitzak berotzeko energia iturri nagusietako bat da, eta industrian asko baliatzen dute produktu kimikoak, botikak eta metalak egiteko batik bat.

«Badakit ez dirudiela, baina gasaren krisialdian gaude», ziurtatu du Robert Habeck Alemaniako Ekonomia ministro berdeak. «Aurrerantzean, gasez eskas ibiliko gara. Prezioak oso handiak dira, eta gehiago handitzeko prest egon behar dugu», esan du. Esan eta egin: Habecken iragarpenaren ondotik, gasaren prezioak beste jauzi bat egin du Herbehereetako TTF gas merkatuan: 126 euroan zegoen gas tona, merkatua zabaltzean, eta 135 euroan, berriz, arratsaldearen hasieran.

Hirugarrena, gertu

Hirugarren maila hori gertu egon daitekeela uste du Alemaniak, kezka handiz ikusten baititu Nord Stream 1 gasbidearen mantentze lanak. Uztailaren 11n hamar eguneko geldialdi tekniko bat egitekoa da Gazprom gasbide horretan, eta Berlinen beldur dira haren ostean itxita iraungo ote duen.

Izan ere, bigarren mailako alarma Nord Stream 1en hornidura arazoek eragin dute. Baltikoaren azpian gasa garraiatzen duen gasbide horren trafikoa %60 murriztu du azken astean Errusiak, Kanadara konpontzera bidali duen konpresore matxuratu bat bueltan jaso ez duelako, bere aurkako zigor ekonomikoen ondorioz.

Erabakia «politikoa» dela ziurtatu du Alemaniako Gobernuak, besteak beste, Errusiak bazuelako Nord Stream 1etik igortzen ez duen gasa beste bide batzuetatik igorri, hala nola Polonia zeharkatzen duen Jamal gasbidetik edo Ukraina zeharkatzen duten Soiuz gasbideetatik. Azken horietan, baina, ez da handitu gas fluxua.

Alemania hornitu ahal izateko, bada beste gasbide bat ere (laugarrena), Nord Stream 2, baina hura balioztatzeko prozesua eten zuen Berlingo gobernuak Errusiak Ukraina inbaditu bezain laster.

Oraintxe bertan, uda hasiera izanik, ez dago gas hornidura arazorik Alemanian, haren kontsumoa asko apaltzen ari delako eta Errusiaz besteko bideetatik iritsitakoa nahikoa delako. Baina arazoa udazkenean edo neguan etorriko da, kontsumoa oraingoaren halako lau denean.

Hilabete epelak eta beroak erreserbak betetzeko erabiltzen dira, eta horretan ari da Alemania ere, %58 beteak baititu biltegiak. Baina helburua da irailaren 30erako %80ean egotea, eta Nord Stream 1etik ezer iristen ez bazaio, kostatuko zaio hori egitea.

Ikatza bueltan

Hori dela eta, igandean Habeckek berak iragarri zuen zentral termikoei baimena emango dietela ikatz gehiago erretzeko, eta horrekin konpentsatzeko, hain zuzen, erreko ez duten gasa eta abenduarekin desagertuko den energia nuklearraren ekarpena.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Jatetxeak itxita eta jende oso gutxi Pekingo kaleetan, maiatzean. ©MARK R. CRISTINO / EFE

OMIKRONAREN KOLPEA

Olatz Urkia

Mundua koronabirusarekin bizitzen hasi den honetan, Txinak ez du bertan behera utzi nahi kutsaturik gabeko estrategia. Eta ordaindu beharreko prezioa altua da. Pandemia hasi zenetik bi urte baino gehiago pasatuta, orain hartu du Txinako ekonomiak kolperik gogorrena.

Kaiet Barberarena, Iholdiko Landaia etxaldean, Kintoa arrazako bere zerrien parkean, joan den ostiralean. ©I.E.

Laborariak kezkatu ditu prezioen goititzeak

Iñaki Etxeleku

Hazkuntzarako kanpoan erosi bazka, ongailu eta erregaien prezioak goratu izanak kinka gaiztoan ezarri ditu laborari franko. Iholdiko Landaia etxaldean ere bai, nahiz autonomia bilatzeak arriskua arintzen dion. Erresilientzia planeko dirua banatzeko Frantziak finkatu arauak, gainera, bazter utzi ditu ehunka etxalde.
Pedro Sanchez, Ministro Kontseilu bereziaren osteko agerraldian. ©Kiko Huesca / EFE

Espainiako Gobernuak 200 euroko txekea emango die errenta apaleko langileei, autonomoei eta langabeei

Irune Lasa

Kotizaziorik gabeko pentsioak %15 igoko ditu, eta garraio publikorako abonuak merkatuko. Pedro Sanchezek energia konpainien irabazien gaineko zerga berria iragarri du. «Gehien lortzen dutenek, ekarpen handiagoa egin behar dute sakrifizio kolektibora».

Pedro Azpiazu Jaurlaritzako Ekonomia sailburua, Eusko Legebiltzarrean, gaur. ©Irekia

Europako funtsetatik 1.090 milioi euro jaso dituzte Arabak, Bizkaiak eta Gipuzkoak

Iker Aranburu

Eusko Jaurlaritza kexu da funtsen banaketa oso motel doalako, eta etsita dago Espainiako Gobernuaren banaketa zentralistarekin.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.