Albistea entzun

ERRESUMA BATUA

Gero eta hesituago egon arren, Johnsonek adierazi du «aurrera» egingo duela

Erresuma Batuko lehen ministroarekin bat egiten ez dutenez, gobernuko 30 bat kidek dimititu dute azken bi egunetan. Tory kritikoek alderdi barruko beste zentsura mozio bat bultzatu nahi dute.

Boris Johnson, gaur, Erresuma Batuko Komunen Ganberan
Boris Johnson, gaur, Erresuma Batuko Komunen Ganberan EFE Tamaina handiagoan ikusi

Igor Susaeta -

2022ko uztailak 6

Boris Johnson gero eta hesituago dago. Izan pandemian Downing Streeteko 10. zenbakian egindako festek eragindako eskandaluagatik; izan duela hilabeteko barne zentsura mozioan ikusi zelako Alderdi Kontserbadorearen diputatuen erdiak, %41 hain zuzen, kontra dituela; izan hedabideek kaleratu dutelako eta Johnsonek onartu duelako Chris Pincher izan Komunen Ganberako toryen talde parlamentarioko bigarren arduradun aukeratu zuela, nahiz eta bazekien sexu jazarpenagatik maiz salatua izan dela; eta izan, azkenik, gobernuko kideak dimititu eta dimititu ari direla. Hori guztia kontuan hartuta ere, Erresuma Batuko lehen ministroak «aurrera» jarraitzeko asmoa du. «Agindu ikaragarri bat eman zaionean [2019ko hauteskundeetan toryek lortutako emaitzengatik], aurrera jarraitzea da lehen ministro baten egitekoa egoera zaila denean. Hori egingo dut».

Mezu bera errepikatu die Downing Streetera lehen ministroarekin biltzera joan diren ministroei. Batzuk babesa agertu diote agintean jarraitzeko, besteek kargua uzteko galdegin diote, zentzuzkoena delakoan. Baina Johnsonek ez du gobernua uzteko asmorik. Erresuma Batuko hedabideek argitaratu dutenez, ministroei esan die dimisioa emanez gero hauteskundeak deitzeko presioa handituko dela, eta behartutako boz batzuetan galtzaile irtengo dela Alderdi Kontserbadorea. Alderdi Laboristaren eta SNP Eskoziako alderdi independentistaren arteko balizko koalizio baten gaineko kezka ere agertu die, iturri horien arabera. Ikusteko dago jarrera horren aurrean ministro gehiagok dimisioa aurkeztuko duten ala gobernuan jarraitzea erabakiko duten.

Aurretik, kontrol saioan mintzatu da gaur Johnson, Komunen Ganberan, eta dimisioa eman dezala eskatu diote oposizioko kideek. Baina, batez ere, Sajid Savid atzo arte Osasun ministroa izandakoak egin du lehen ministroaren aurka. Dimisioa aurkeztu zuen atzo, eta, hori jakinarazteko gutunean bezala, gaur ere kargua uzteko eskatu dio Johnsoni. «Ondorioztatu dut arazoa goi-goian hasten dela», egotzi dio. «Balioak eta jarrerak» izan ditu hizpide, eta gobernuko kideak «kontzientziaz» jokatzera deitu ditu. «Norabide honi jarraitzen badiogu, ez dakit hurrengo belaunaldiek Alderdi Kontserbadorea nola ikusiko duten; oso kezkatuta nago horrekin».

Gobernuko kiderik nabarmenenetako bat zen Savid. Dimisioa eman zuen atzo, eta ia-ia aldi berean gauza bera egin zuen Rishi Sunak Ekonomia ministroak ere, «seriotasun» gabezia leporatuz Johnsoni. Azken 24 orduetan gobernuko beste 30 bat kidek dimititu dute, nahiz eta horiek maila apalagoko karguak zituzten. Gaur dozena bat inguruk hartu dute erabaki hori, eta horietako bostek gutun bateratu bat sinatu eta argitaratu dute. «Argitara atera diren arazo guztiak aintzat hartuta, gero eta argiago geratu da gobernuak ezin duela funtzionatzen segitu», nabarmendu dute, besteak beste.

«Egun handia»

Baina Johnsonek ez du kargua uzteko asmorik, nahiz eta zenbait hedabidek argitaratu duten beste ministro batzuek ere badutela berekin biltzeko eta dimititu dezala eskatzeko asmoa. Kontrol saioaren hasieran azpimarratu du Johnsonek «egun handia» dela gaurkoa, «azken hamarkadako zerga murrizketarik handiena» ezarri asmo duelako. Saioa amaituta, lehen ministroaren prentsa idazkariak adierazi du Johnson prest dagoela alderdi barruko beste konfiantza mozio bati aurreko egiteko, eta lehen ministroak berak pentsatzen duela irabazi egingo duela, gainera.

Bloomberg berri agentziak toryen iturriak aipatuz kaleratutako informazioaren arabera, Johnsonen dimisioa eskatzen duten Alderdi Kontserbadoreko diputatuek datorren astean egin nahiko lukete beste bozketa bat. 1922 Batzordeak deitu behar du horretara —gobernuan ez dauden diputatu toryak biltzen ditu batzorde horrek—, arautegiak zehazten duenez, diputatu toryen %15ek hala eskatuta. Arautegiak zehazten du, gainera, azkena egin zenetik urtebete igaro arte ezin dela beste zentsura mozio bat egin. Ekainaren 6an izan zen aurrekoa. Nolanahi ere, arautegi hori aldatu daiteke taldeko zuzendaritza aldatuz, esaterako, eta horrenbestez, beste bozketa batera deitu.

Lehen ministroa ahalegindu da azken asteetan brexit zalerik gogorrenen babesa biltzen, beste bozketa posible bat irabazteko eta aurrera jarraitzeko. Horretarako, esaterako, Ipar Irlandarako Protokoloa alde bakarrez erreformatzeko lege proiektu bat aurkeztu du Komunen Ganberan. Agindutako zerga murrizketaren bidez, gainera, diputatu tory liberalenen botoak arrantzatu nahi ditu. 2025eko urtarrila baino lehen egin beharko dituzte hurrengo hauteskunde orokorrak Erresuma Batuan.

Erreferendumari ezetz

Boris Johnson Erresuma Batuko lehen ministroak erantzun dio Nicola Sturgeon Eskoziakori ez dagoela ados 2023ko urriaren 19an independentzia erreferendum bat egitearekin. Sturgeonek argitaratutako gutun batean esan dio ez dela horretarako unea, 2014ko galdeketan argi geratu zela iritzia.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Esteron ibaiaren ibarreko tarte lehortu bat, Niza hiritik gertu (Okzitania), uztailaren amaieran. ©SEBASTIEN NOGIER / EFE

Europan azken bostehun urteetako lehorterik handiena espero dute

Gorka Berasategi Otamendi

Kontinentearen erdialdeko eta mendebaldeko estatuak ezohiko bero boladak eta lehorteak ari dira pairatzen, klima larrialdiagatik. Suteek berotegi gas asko isuri dute zenbait herrialdetan

Salman Rushdie idazlea, 2019ko azaroaren 11n, Berlinen. ©HAYOUNG JEON / EFE
Monusco Nazio Batuen Kongoko Errepublika Demokratikorako misioaren kontrako protestetan hildako herritar baten hileta, aurreko astean. ©STR / EFE

Odolak mendekua nahi du

Oskar Epelde Juldain

Egunotan dozenaka lagun hil dira NBEren Kongorako misioaren kontrako protestetan. Milizianoen erasoen aurrean ezer ez egitea egozten diete kasko urdinei.

FBIko bi agente Donald Trumpen Mar-a-Lago etxearen atarian (Palm Beach, Florida), joan den asteartean. ©CRISTOBAL HERRERA-ULAXKEVITX, EFE

FBIk sekretupeko dokumentuak eraman ditu Trumpen Mar-a-Lago etxetik

Gorka Berasategi Otamendi

AEBetako presidente ohia ikerketapean dago, ustez espioitza legea urratzeagatik. Floridako etxean atzeman dioten dokumentazioaren edukia defentsa arloko gaiekin lotuta dago, besteak beste.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.