Etxera bidean da Ion Parot euskal presoa. Gaur atera da Mureteko presondegitik, Etxerat elkarteak jakinarazi duenez, eta bertan egin diote lehen harrera haren senideek. Urteetako batailaren ondotik, Parisko Dei Auzitegiak irailaren 22an onartu zien baldintzapean aske ateratzeko aukera hari eta Jakes Esnali. Hala, Euskal Herrirako bidea hartu du gaur, baina ez da osoki aske izanen, baldintza biziki zorrotzak bete beharko baititu ondoko urteetan. Orotara, 32 urte, sei hilabete eta bederatzi egun iragan ditu Frantziako presondegietan. 71 urte ditu.
🟢ðŸ“ÂÂÂÂŒ📢📢 32 urte eta erdi espetxean eman ondoren kalean da Ion Kepa Parot preso baionarra. Mureteko espetxetik atera da #batgutxiago Ongi etorria!
— Etxerat Elkartea (@EtxeratElkartea) October 13, 2022
Etxean preso igaro beharko du urte bateko epe froga baldintzapeko askatasunean geratu aurretik
Oharra 👇https://t.co/diLEXsNiAipic.twitter.com/BGm1fI5DTE
1990eko apirilaren 4an atxilotu zuten Ion Parot. Egun batzuk lehenago haren anaia Unai atxilotu zuten Espainia hegoaldean —Zaballako presondegian dago—. Beste lapurtar batzuekin batera, ETAren Argala komandoa osatzea leporatu zieten. Atxilotuetako hiru biziarteko zigorrera kondenatu zituzten 1997an Parisen egin zieten epaiketan: Ion Parot, Jakes Esnal, eta Frederique Haranburu Xistor. Geroztik, ikur bilakatu dira hirurak: Argala komandoaren ibilbideagatik, baina baita epaitegietan izan dituzten gorabeherengatik ere. Haranburu 2020ko azaroan gelditu zen aske, baldintzapean. Esnal ondoko egunetan ateratzekoa da. Unai Parot da afera hartatik preso segituko duen bakarra. Lapurdiko azken presoa da.
1999an izan zuten epaiketaren ondotik, Ion Parotek kartzelaldiaren hamabosgarren urtetik aitzina zuen aukera baldintzapean aske geratzea eskatzen hasteko, hau da, 2005etik. Orotara sei eskaera egin behar izan ditu epaitegien baiezkoa eskuratzeko. Ekainean, haren askatasun eskaeraren kontra agertu zen, beste behin, terrorismoaren kontrako Frantziako fiskaltza, baina azkenerako baiezko erabakia hartu zuen Parisko Dei Auzitegiak.
Ikusi gehiago: Jon Agirre Agiriano preso ohia hil da
Azken urteetan, behin baino gehiagotan eskatu dute Esnal, Parot eta Haranburu askatzeko, eta mobilizazio andana antolatu dituzte preso horien sostenguz. Uztailean, Ipar Euskal Herriko errepide sarea blokeatu zuten Bakegileek egun oso batez, Frantziako Gobernuari eskatzeko Euskal Herriko gatazkaren konponbidean urratsak egin ditzala. Parot eta Esnalen baldintzapeko askatasuna onartzea lehentasun bat zela adierazi zuten.
Azken urteetan, behin baizik ez du ukan presondegitik ateratzeko baimena Ion Parotek. 2018ko martxoan izan zen: zendu berri zen bere amari omenaldia egin zioten Altzürükü (Zuberoa) sorterrian senideek eta ezker abertzaleko zenbait militantek, eta hara joateko aukera izan zuen.
