PPk helegitea jarri zuen abortuaren 2010eko legearen aurka, eta helegite hori aztertzeko saioa zuen gaur Espainiako Auzitegi Konstituzionalak. Zazpi magistratuk eman dute legearen aldeko eta PPren helegitearen aurkako botoa, eta lauk eman dute kontrako iritzia. PPren helegiteak abortatzeko epeak jarri zituen jomugan, besteak beste, baina auzitegiaren ebazpenak ontzat eman du atal hori. Enrique Arnaldo bloke kontserbadoreko magistratua zen ebazpena idaztekoa, baina epaileen gehiengoak erabaki du lan hori Inmaculada Montalban ildo progresistakoak egitea.
2010eko legeak epe sistema bat du funtsean, haurdunaldiaren asteen araberakoa. Hala, 14. astetik 22.era bitartean, amaren bizia edo osasuna —fisikoa, psikikoa zein soziala— arriskuan badaude soilik aborta daiteke, betiere mediku baten eta espezialista baten aldeko txostenarekin. 22. astetik aurrera, berriz, ez bi egoeratan eten daiteke haurdunaldia: fetuak gaixotasun larri eta sendaezina balu, edo jaiotzean heriotza eragingo dion arazoren bat balu.
Espainiako Gorteek iazko maiatzean onartu zuten abortua arautzeko beste lege bat. Horren arabera, legea onartzen denetik, 16 eta 17 urteko emakumeek ez dute gurasoen baimenik behar haurdunaldia eteteko. Arauak kendu egin du ordura arte indarrean egon zen beste baldintza bat: abortatu ahal izateko hiru egunez «gogoeta» egin beharra.
Epeena ez ezik, adingabeen auzia ere eztabaidagai izan zen 2010eko testuari dagokionez. 16 urtetik aurrerakoek gurasoen baimenik gabe abortatzeko modua eman zuen legeak; hori bai, adingabeen gurasoei jakinarazita abortuaren berri, ezinbestean. Hori ere onetsi du orain Auzitegi Konstituzionalak.
