POLITIKA
Nerea Melgosak ordezkatuko du Artolazabal Eusko Jaurlaritzan
Urkulluk gaur sinatuko ditu Artolazabalen kargugabetzea eta Melgosaren izendapena.
Nerea Melgosak hartuko du Eusko Jaurlaritzako Berdintasun, Justizia eta Gizarte Politikako sailburu kargua Beatriz Artolazabalen ordez. Iñigo Urkullu Eusko Jaurlaritzako lehendakariak gaur sinatuko ditu Artolazabalen kargugabetzea eta Melgosaren izendapena. Artolazabal EAJren Gasteizko alkategai izendatzeak eragin du aldaketa Jaurlaritzan.
Melgosa gasteiztarra da, 1970ean jaioa, eta 2020tik dago Berdintasun, Justizia eta Gizarte Politikako Sailean, aholkulari gisa. Aurrez, 2019 eta 2020 bitartean Arabako Foru Aldundiko Berdintasun eta Giza Eskubideen zuzendaria izan zen, eta zinegotzi aritu zen Gasteizko Udalean, 2015 eta 2019 bitartean. Gainera, 2015-2016 bitartean Arabako Parke Teknologikoko Administrazio Kontseiluko ordezkaria izan zen, eta CEIA Arabako Enpresa eta Berrikuntza Zentroko Administrazio Kontseiluko eta Akziodunen Batzarreko ordezkari (2015-2019). GILSA Gasteizko Industria Lurra S.A. sozietate publikoaren presidentea izan zen 2015 eta 2019 bitartean, eta, epe berean, Gasteizko Garraio Zentroko ordezkaria, besteak beste.
Ikusi gehiago: Urkulluk dio EAJk gauzak «ongi» egin dituela egoera zaila izan arren
Deustuko Unibertsitatean Soziologian eta Politika Zientzietan lizentziatua da. EAJko Euzkadi Buru Batzarreko kide ere bada, 2020tik.
Melgosak bihar 09:00etan hartuko du kargua. Ondoren, Jaurlaritzak asteroko gobernu kontseilua egingo du, eta ondorengo agerraldira irtengo da Melgosa bera, Bingen Zupiria bozeramailearekin.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
