Eusko Jaurlaritzak %1,5era jaitsi ditu hazkunde aurreikuspenak

Eusko Jaurlaritzak hurrengo bi urteetarako hazkunde ekonomikoaren datuak berrikusi ditu, eta 2023rako %1,5ean kokatu du BPGaren igoera, eta 2024rako, berriz, %2,1ean. Halaber, kalkulatu du 20.000 enplegu sortuko direla, urtero 10.000. Iazko urrian %4,3ko hazkundea iragarri zuen 2023rako, eta %2,1ekoa 2024rako.

Eusko Jaurlaritzak 2022ko azken hiruhilekoan izan den dezelerazioaren ondorioz egin du berrikuspen hori. Pedro Azpiazu Ekonomia eta Ogasun sailburuak zehaztu duenez, gaur egungo egoerak aurreikuspen «kontserbadoreak eta zuhurrak» eskatzen ditu, ziurgabetasuna «oso handia» delako, Ukrainako gerrak eta inflazio handiak bere horretan jarraitzen dutela eta. Horri gehitu dizkio moneta politikaren ondorioak eta sistema bankarioa jasaten ari den arazoak.

Eusko Jaurlaritzak uste du ekonomiak moteltzen segituko duela urtearen lehen erdian, eta hortik aurrera hazi egingo dela. «Elementu positibo gisa», nabarmendu du aurten ehun ekonomikora iristen hasiko direla Europako funtsak.

Iñaki Barredo sailburuordeak gogorarazi du 2022. urtea «oso positiboa» izan zela Arabako, Bizkaiko eta Gipuzkoako ekonomiarentzat: gogoratu du BPGaren batez besteko hazkundea %4,4 izan zela, eta «modu nahiko homogeneoan» gertatu zela alor guztietan. Urte hasiera oso ona izan zen, baina, azpimarratu duenez, Ukrainako gerra hasi zenetik, moteltzen hasi zen, eta batez ere nabaritu zen industrian, eraikuntzan eta, neurri txikiagoan, zerbitzuetan. Urte hasiera honetan joera hori mantendu egin dela adierazi du.

Datozen hilabetei begira, «baikor» azaldu da, eta udaberritik aurrera egoera aldatuko dela aurreikusten du, eta alor guztietan, batean izan ezik: esportazioetan. Barredoren arabera, inguruko herrialdeen egoeraren ondorioz apaldu egingo dira kanpo salmentak, eta batez ere Alemanian egindakoak —herrialde hori da euskal produktu industrialen merkatu nagusia—. Kanpo merkataritzaren saldoa orekatu egingo lukete inportazioek.

Egoera ezengokorra izan arren, Barredok uste du inbertsioen hazkundea «mantenduko» dela —%2,4 inguruan—, eta kontsumo pribatua hazi egingo dela (%1), bereziki udaberritik aurrera; ordurako espero du jaisten hasiko dela inflazioa, eta bereziki azpiko inflazioa.

Bankuen egoera

Credit Suisseren krisiaz eta Silicon Valley Banken hondoratzeaz ere mintzatu da Azpiazu, eta «lasaitasun mezua» bidali du. Bi finantza erakunde horiek sortutako egoera «krisi, krisi txiki edo finantza ekaitza txikitzat» jo du, baina onartu du burtsan kotizatzen duten banku ugaritan «asko eragiten» ari dela, eta adi egon beharra dagoela. 2008an geratutakoa gogoratu du —«finantza sisteman, izua abiadura handiz hedatzen da», ohartarazi du—, baina gaineratu du ez dela «alarmismoan» erori behar.

Euskal Herrian egoitza duten bankuei buruz —Kutxabank aipatu du— esan du «erabat isolatuta» daudela —Kutxabankek ez du burtsan kotizatzen, ezta Laboral Kutxak ere—, eta egoerari eusteko «nahikoa kaudimen» dutela. Hala ere, azpimarratu du «behar izanez gero» Jaurlaritzak eskura dituen erabakiak hartuko dituela.