Ertzainak Borrokan taldearen protestek Bilboko, Donostiako eta Gasteizko sarrerak blokeatu dituzte

Ertzaintzaren protestek ondorioak izan dituzte Bilboko, Donostiako eta Gasteizko errepideetan. 8:30ean hasi dira auto ilarak hiru hiriburuetan, eta 10:30ak arte iraun dute. Bilbon Erandioko Carrefour saltokitik eta Zorrozgoitiko aparkalekutik abiatu dira; Donostian, Añorgatik, Belartzatik eta Mercachinatik; eta Gasteizen, Mendizabalatik. Mobilizazioak egin dituzte Eusko Jaurlaritzako «Segurtasun Sailaren inposizioaren eta immobilismoaren kontra, hamar urte baino gehiago iraungita dauden Ertzaintzaren lan baldintzak ez dituelako negoziatu nahi».

Vitoria, Donostia y Bilbao. Hoy todos los ciudadanos vascos han sabido del problema existente en la @ertzaintzaEJGV , a ell@s también les afecta. @ertzainas_lucha por un CONVENIO DIGNO 👮‍♂ï¸ÂðŸ‘®‍♀ï¸Â pic.twitter.com/cb3JBcbPer

— Ertzainas en lucha (@ertzainas_lucha) May 25, 2023

Greba mugimenduari Ertzaintzan ordezkaritza duten sindikatu guztiak atxiki dira, ELA izan ezik. Herenegun bilera bat egin zuten sindikatu horiek, Ertzainak Borrokan taldeak eta bertze zenbait eragilek; bilera «oso positiboa» izan zela ondorioztatu zuten. Hala, adostu zuten «lan eginen dutela Ertzaintzaren kolektiboarentzako onuragarriak diren akordioak lortzeko».

Ertzaintzan ordezkaritza duen ELA sindikatuak, baina, ez du ikusten «egiazko» borondaterik Ertzaintzaren eredu sindikal «nagusia» aldatzeko, eta Segurtasun Sailarekin «benetan talka egiten» duen bertze eredu baten alde egiteko.

420 ibilgailu

Mobilizazioan 420 ibilgailu inguruk parte hartu dutela adierazi dute antolatzaileek. Hala ere, oraingoz ez dute datu ofizialik zabaldu. Ez da gisa horretako protesta bat egiten duten lehenbiziko aldia: 2015ean, Ertzaintzako sindikatuek deituta, auto ilarak antolatu zituzten Bilbon. Ehunka auto mugitzea lortu zuten, eta, Bilbo erdialdean ez ezik, A-8 autobidean ere pilatu ziren autoak. Helburua zen Eusko Jaurlaritzarekin negoziatu ahal izatea lan baldintzen hobekuntza.