Jakina zen hauteskunde zikloaren egutegia: udal eta foru hauteskundeen ondoren izango dira Espainiako Gorteetakoak, eta datorren urtean, Eusko Legebiltzarrekoak. Baina Pedro Sanchez Espainiako gobernuburuak sorpresa eman zuen atzo, bozketa udazkenetik uztailaren 23ra aurreratuta. Egutegia egokituta, Iñigo Urkullu Jaurlaritzako lehendakariari galdetu diote ea berak ere asmorik izan dezakeen legealdia dagokion baino arinago amaitzeko eta hauteskundeak aurreratzeko. Ezetz erantzun du Urkulluk.
Urkulluk aitortu du Sanchezen iragarpenak «ezustean» hartu duela, baina bere nahia da legealdiko azken hilabeteetan «normaltasunez» aritzea. Berez, datorren urteko uda aldera amaituko da legegintzaldia.
Sanchezen erabakiaren ondorioez, berriz, Urkulluk esan du Espainiako Gobernuak ez dituela bete legealdi hasieran hartutako konpromisoak, batez ere Gernikako Estatutuaren arabera Eusko Jaurlaritzari dagozkion eskumenak eskualdatzeko lanei dagokienez.
Espainiako Gobernuko Ministroen Kontseiluak 2020ko urtarrilean onartu zuen falta diren eskumenak transferitzeko egutegi bat, baina hiru urtean apenas eman duten pausorik horiek gauzatzeko. 2021ean, hiru eskumen transferitu zituzten: errepide bidezko garraioa, espetxeak eta argitalpen serializatuen nazioarteko zenbaki normalizatuen esleipena. Iaz, berriz, bizitzeko gutxieneko errentaren kudeaketa. Bi gobernuek hilabeteak daramatzate aldiriko trenen eskumena eskualdatzeko negoziazioetan.
