Eusko Jaurlaritzako Hezkuntza Sailak ezohiko diru laguntza bat onartu du ikasturte hasieran autobus zerbitzurik gabe izan diren familiei kalte ordainak emateko. Bizilekutik ikastetxera dagoen kilometro bakoitzeko 29 zentimo ordainduko dizkie Jaurlaritzak astebete inguru eskola garraio zerbitzurik gabe egon diren Arabako eta Bizkaiko familiei.
Eusko Jaurlaritzako gobernu bileraren osteko agerraldian egon da Jokin Bildarratz Hezkuntza sailburua, eta hark eman du diru laguntzen berri. Azaldu du deialdia irailaren 26an argitaratuko dela EAEko Aldizkari Ofizialean, eta laguntzak biharamunean sartuko direla indarrean; alegia, hilaren 27an. Familiek hilabeteko epea izango dute eskaria aurkezteko: urriaren 27ra arte, hortaz.
Diru laguntza jaso nahi duten familiek dokumentu bat bete eta ikastetxeko zuzendaritzan aurkeztu beharko dute, aurrez aurre edo telematikoki. Seme-alaba bakoitzeko eskari bat aurkeztu ahal izango dute, eta dirua «denbora tarte labur batean» jasoko dutela ziurtatu du Bildarratzek.
Honako hauek eska dezakete diru laguntza: eskola garraioaren erabiltzaile diren Haur Hezkuntzako (HH) 3. mailakoek, HHko 4. eta 5. mailakoek, Lehen Hezkuntzakoek, Derrigorrezko Bigarren Hezkuntzakoek eta Oinarrizko Lanbide Heziketakoek. Jardunaldi zatitua duten ikastetxeetan, joan-etorriko bi ibilbide hartuko dira kontuan, eta jardunaldi trinkoa dutenei dagokienez, ibilbide bakarra. Bizilekutik ikastetxera bitarteko distantziak neurtzeko, GeoEuskadi kartografian oinarritutako tresna erabiliko du Jaurlaritzak, baina beste aldagai batzuk ere bai: hala nola ikastetxearen ordutegia edo ikasleek eskolako jantokia erabiltzen duten ala ez. Kalte ordainaren zenbatekoa kalkulatzeko, kontuan hartu dute administrazioak bere langileei laneko bidaiak egiten dituztenean ordaintzen dien zenbatekoa –kilometroko 26 zentimo–.
Eskola garraioko zerbitzua astelehenean berrezarri zuten, Hezkuntza Sailak eta garraio enpresek erdietsitako behin-behineko akordioari esker. Bi aldeek «ahalik eta egonkortasunik handiena» bilatuko dute hurrengo ikasturterako, baina, orain, Eusko Jaurlaritzaren lehentasuna da gurasoek jasandako kaltea konpentsatzea eta garraio zerbitzurik ezak eragindako kostuak «arintzea».
